İlahi əsma iyən nomon

İlahi əsma iyən nomon

İlahi əsma və nomonku coqıləyni Rəufi ism iyən nome.Rəuf çı rəfəti rişəku və çı vey şiddətin iyən ziyodə rəhmət iyən mehribonəti mənoədəy.qıləy rəhmətədə ki,çı Rəhmoni ismiku peqətə bıə,çəydınyoədə bıə məhəbbəti hevujə sufrəy ki,beğeyd iyən beşərt həmmə insonon dəqəteydə.İlahi həmonə hevujə rəhmət ki,kofir iyən mumin zıneydəni və həmməkəsi bəştə rəhməti çətri ji vardedə.Rəhimi ismədə çı Xıdovəndi rəhmət həm çı insonon ozazviye seyri koyədə çəy məxsusə rəhməte ta çəy mehr və məhəbbət ğıyoməti rujədə iyən coqlə dınyoədə həm idomə pəyduko.əmmo ım nom bo əkəsone ki,Xıdovəndi rəhməti çəy həkimonə irodə cəhətədə çəyku oko doydə və çı hidoyəti məsir iyən royədə hərəkət kardedə.iyo ehanə lozım bıbu,Rəhimə Xıdo mumkine bo rəhməti çətri jiyədə ğərolış qətə şəxsi pokəti,təkamul iyən ozavziyero,de saxtə meydonon bə əməl vardey imtovonko ta əv bə ziyodə rəhməti şomil bıbu.məsələn qıləy inə ki,boştə fərzəndi tərbiyəro bəştə məhəbbəti əsos bəçəy ələyh ğəddor iyən vey ciddi beydə.əmmo Rəuf çı Xıdovəndi rəhmət iyən məhəbbəte ki,hətto bo insoni hidoyət iyən hərəbaxtətiro boçəy saxti kəşey iyən bə məşəğğət eqıneyro hozzı ni və ımi haştedəni.....

Rəufi ism Məcidə-Ğıronədə yonzə kərə omə ki,çəy nəv dəfə de Rəhimi ismi bə ico bıə.kali təfsırəvon iyən luğətşınoson ım dıqlə ismışon mutəradif iyən sinonim zınəşone.əvon bın etığod iyən bovədən ki,Kərimə-Ğıronədə ım dıqlə ismi de iyande bə icoəti,bə İlahi oxoş nıbə rəhməti bıə təkidi cəhəte.əmmo mıfəssıronku bəzi qıləyni çın dıqlə nomi miyono tafutin ğayilin və həmçinin Rəfət çı zərəlon dəf kardey zəminədə məhəbbəti mənoədəy və rəhmət çı mənafe cəlb kardeyro bıə məhəbbəti mənoədəy.bəçəy xoto Rəufi ism həm çı Rəhimi nomi bənav zikr kardey beydə.İzzuddin ibn Əsir çı əhli-sınnəti məşhirə muhəddis iyən torıxəvon “Ənnəhayə fi ğəribil-hədis və əsər” luğətnomədə çı dıqlə ismi miyono farğış noə və nıvışteydə ki,Rəfət çı Rəhmətiku vey barz iyən vey dəğiğə mərhələdəy və hiçvaxti bə xoş nıomə məsələonədə oko doey beydəni.əmmo Rəhmət bə xoş nıomə koonədə ki,bə qıləy məsləhəti xoto əncom doey beydə.(məsələn mumkine votey beydə bə qıləy rəhməti xoto ki,həkim iyən doktor çəy siyo bıə anqıştəş bırniyeş piyedə ta noxəşəti bəçəy bədəni uzvon coqləyni sitoyət nıko.əmmo Rəfət iyo oko doey beydəni)......

Xıdovənde-Aləm Həcci mıborəkə surə 65-ə şərifə ayədə hamyedə:”ələm təra ənnəllahə....aya nıvinde ki, Xıdovənd zəminədə bıə çiyon iyən deçəy əmri dıyoədə hərəkət kardə kəştiyon boşməş ram kardə və osmonış oqətə ta ğərəz çəy fərmoni bə zəmini nıeqıno?həyğətən Xıdovənd bə milləti nisbətədə rəhmət iyən rəfətış heste”.bın ayədə çı Xıdovəndi ğuidrəti bəyoni bədiqə,bə Xıdovəndi boştə həmmə məxloğati zəmini çokonə təsxir kardey iyən çəvon çı insoni xıdmətədə bıey işorə kardedə və hamyedə:Xıdovənd bə milləti nisbətədə rəuf iyən mehribone.