İlahi əsma iyən nomon

İlahi əsma iyən nomon

İlahi əsma və nomonku coqıləyni Zulcəlali vəl-İkrami ism və nome.Zulcəlali vəl-İkrami ism çı Xıdovəndi husna ismon iyən çokə nomonkuye ki,deştə məfhumi bə Xıdovəndi qırd Cəlol iyən Cəmoli ismon şomil beydə.

Zulcəlali vəl-İkrami kəlmə dıqlə Cəlol iyən İkrami kəlməku təşkil bıə.Zu ərəbi zıvonədə çı soyb və maliki mənoədəy və Zulcəlol yəni Xıdovənd ıştə zotədə qırd kəmol,yolyəti,məcd iyən əzəməti sıfəton soybe. cəlol ğədr,mənzilət,əzəmət iyən kibriya yolyəti mənoədəy.Zulikram həm bın mənoədəy ki,Xıdovənd bə bandəon nisbətədə çı kərəm iyən baxşeşi soybe.kərəmi soyb bə hakəsi hətto tələb nıkardə holədə baxşeydə və bəştə əto xoto həm bə hiçkəsi qıləy mınnət noydəni.qıləy zəmon ki,bəştə bandə və`də doydə bəy bəfo kardedə və ehanə inson çəyku qıləy hocət tələbko,çəy ehtiyocisə ziyodə bəy əto kardedə.Xıdovəndi krəmədə ım vəs kardedə ki,Əv fəğət de qınokori əfvi iyən baxşeşi kifoyət kardedəni, bəlkəm çəy qınoon ehanə loyığ bıvindo,bə həsənoti təbdil bəkarde və çunki,inson çı qıləy təkvini iyən inkişofi xısusiyyəti soybe,Xıdovənd bəy kəromət baxşeydə və de ağl,ixtiyor iyən fiki,votey iyən nıvıştey ğıvvə,rostə ğaməti əto kardey və çəy de Xıdovəndi baxşeş, əfv, nemət, səxovət,hikmət iyən rəfətiku bəhrəş bardə.çoko ki,İsra mıborəkə surə 70-ə şərifə ayədə jıqo haçmyedə:”və ləğəd....və bə rosti əmə Odəmi fərzəndon qiromi qətemone”.....

Zulcəlali vəl-İkram dı kərə Kərimə-Ğıronədə oko doey bıə və dı kərə həm Ərrəhmoni mıborəkə surədə omə.Ərrəhmoni mıborəkə surə ki,bənə Ğıroni ərus iyən vəyu nomi ğeyd kardey beydə,de Xıdovəndi Rəhmoni nomi bino beydə və de pərvərdıqori Zulcəlali vəl-İkram nomi bə oxo rəseydə.ım surə çı Xıdovəndi dınyo iyən axırətədə bıə neməton kompleks iyən məcmuə zikr kardedə və aşmardedə:joqo ki, Ərrəhmoni mıborəkə surədə dınyo mıxtəlifə maddi iyən mənəvi neməton zikri bəpeştə hamyedə:”və yəbğa...və fəğət ıştı pərvərdıqori cəlol iyən qiromiyə soybə zot baği bəmande”.peşo çı Xıdovəndi coqlə neməton bə yod dənoydə    və oxoyədə jıqo hamyedə:” təbarəkəlləzi.....cəlol iyən qiromiyə soybə ıştı pərvərdıqori nom de bərəkəti pur iyən zəvol pəydu nibəkarde”.