İlahi əsma iyən nomon

İlahi əsma iyən nomon

Zulcəlali vəl-İkram dı kərə Kərimə-Ğıronədə oko doey bıə və dı kərə həm Ərrəhmoni mıborəkə surədə omə.Ərrəhmoni mıborəkə surə ki,bənə Ğıroni ərus iyən vəyu nomi ğeyd kardey beydə,de Xıdovəndi Rəhmoni nomi bino beydə və de pərvərdıqori Zulcəlali vəl-İkram nomi bə oxo rəseydə.ım surə çı Xıdovəndi dınyo iyən axırətədə bıə neməton kompleks iyən məcmuə zikr kardedə və aşmardedə:joqo ki, Ərrəhmoni mıborəkə surədə dınyo mıxtəlifə maddi iyən mənəvi neməton zikri bəpeştə hamyedə:”və yəbğa...və fəğət ıştı pərvərdıqori cəlol iyən qiromiyə soybə zot baği bəmande”.peşo çı Xıdovəndi coqlə neməton bə yod dənoydə və oxoyədə jıqo hamyedə:” təbarəkəlləzi.....cəlol iyən qiromiyə soybə ıştı pərvərdıqori nom de bərəkəti pur iyən zəvol pəydu nibəkarde”.ım dıqlə təbir ın həyğəti bəyon kardedə ki,həmmə çi de Xıdovəndi pokə zoti bə oxo rəseydə və harçi heste çəy tərəfikuye.dınyo çəy səmtikuye və axırət həm çəy tərəfikuye.çəy cəlol iyən ikrom həmmə çiş dəqətə və bə həmmə çi şomil beydə.Ayətullah Məkarim Şirazi iyən i dastə coqlə ənıvışton 23 cildinə Nınunə təfsirədə ın ayə jıqo bəyon kardedən: təbarək çı bərəkəti rişəku çı şaturi sinə mənoədəy və çun ki,şaturon iqlə vırədə hıtə iyən sabit mandə zəmonədə ıştə sinə bə zəmini dəçokneydə.ım kəlmə sabit mandey,poydor iyən dəvom bıey mənoədə oko doey bıə və həmçinin çun ki,dəvomin iyən zəvol pəydu nıkardə sərmoyə ziyodə foydəonış heste,bə de foydə pur bıə mevcudi mıborək votey beydə və həmməysə vey ləyoğətinə kəs ki,ın unvon bəy loyığe, fəğət Xıdovəndi pokə zote ki,çı həmmə nemət iyən bərəkəton sərçeşmə beydə........

Zulcəlali vəl-İkram bıə Xıdovənd çı yolyəti,fəxr iyən əzəməti soybe.har şərəf,məcd.izzət iyən ğudrət bə Xıdo məxsus bıə və deçəy vositə mevcud bəbe iyən çəyku sadir beydə.çoko ki,har qıləy kəromət iyən fəzl, nemət iyən ehson de Xıdovəndi koməkiye.İslomi dınyo yolə arif iyən filosof bıə Muhyiddin Ərəbi jıqo hisob kardedə ki,Xıdovəmdi ikramış bə cəloli izofə və əlovəş karde.çıro ki,ehanə inson çı Xıdovəndi vəsfi de Cəloli iyən İkram iyən yolyəti nıbə holədə bıməso,bəvədə qıləy yə`s və noumu bə vucud omeydə və əv ıştəni bə Xıdovəndi vusal iyən rəseyku vey bə diyəro vindedə.inson çı İlahi əzəmət iyən cəloli mığobilədə ıştəni qıləy çi vindedəni.əmmo Xıdovənd de Əkrəmi bə Cəloli ətf iyən əlovə kardey,çı insoniku ım təfəhhumi xaric kardedə və əy bəştə məhəbbət iyən kərəmi umudəvo kardedə.həyğətədə de ım dıqlə miyono cəm kardey dərəsey beydə ki,harçənd Xıdovənd vey əzəmətine,əmmo eyni yolyətiyədə deştə təfəzzul iyən kərəmi roy bə insoni qıləy dığğət kardedə və əy aziz və qiromi qəteydə.....

İslomi aziz-qıromiyə peyğombəriku(s) rəsə qıləy hədisədə handedəmon:qıləy şəxs çə həzrəti məhzərədə dıvo kardedəbe və votedəbe:”ya zəlcəlai vəlikram!”ha çı cəlol iyən ikrami soyb bıə Xıdovənd ha! Peyğombəri(s) hamyeşe:ısət ki,Xıdo de ım nomi vanqı karde,ıştı dıvo mıstəcob və ğəbul be.harçi piyedə tələbkə....