İlahi əsma iyən nomon

İlahi əsma iyən nomon

Kərimə-Ğıronədə dı kərə Cami nom Cəməkə mənoədə oko doey bıə.Ali-İmrani mıborəkə surə 9-ə şərifə ayədə jıqo omə:”Rəbbəna....Xıdolim ha! tı milləti qıləy ruj ki,çəy bə əməl omeyədə hiç qıləy şəkk və tərdid ni,cəm bəkardeyş”.həmçinin Nisa mıborəkə surə 140-ə şərifə ayədə Xıdovənde-Aləm hamyedə: ”İnnəllahə....bızınən ki,Xıdovənd həmmə kofiron iyən mınofiğon cəhənnəmədə cəm bəkarde”.

Cami usm iyən nom bənə Xıdovəndi ismi unvoni bın mənoədəy ki,Əv milləti çə həmmə kəson maqi bəpeştə bəyji bəkarde və sənibəton jimoni bədiqə qırd həmməkəsi cəm bəkarde.Camiyə Xıdovənd ğıyoməti ruji ki,çı həmmə kəsi botın oşko bəbe,insonon qıləy holədə ki,pərokəndə iyən volo-volo bəbeyn,bo mıhosibə iyən ıştə vəzifon təyin kardero,qıləy məkonədə cəm bəbeyn.bə rujədə mıəyyən bəbe ki,de Xıdo mıomilədə kom kəs ğalib və kom kəs dəboxtə iyən məğlub bıə kəs bəbe.bə qıləy rəvoyəti əsos muminonku kali qıləyni həm bın rujədə çı ziyoni hissi bəkardeyn ki,boçi ziyodə salehə əməlonışon əncom doəni və bə vırə rosnəşon ni ta ısət çı qıləy barzə səvob iyən nemətonku bəhrə bıbo.joqo ki, Xıdovənde-Xalığ Təğabuni mıborəkə surə 9-ə şərifə ayədə hamyedə:”yəvmə yəcməukum...(bəyod biyənən) qıləy ruji ki,Xıdo şıməni həmmə məhşəri ərsədə(bo hisobiro) cəm bəkarde.həmonə ruji Təğabuni(xəsorət iyən peşmonəti ruje) və hakəs bə Xıdo imon biyo və salehə əməlko,çəy qınon bəbaxşe iyən əy çəvon doon jiku nəhron(ruon) cari bıə vəhıştədə ğərol bədoe.əvon əyo əbədi bəmandeyn və ım qıləy dıjdə səbarzətiye”.votey lozıme ki,tıbğe Kəhfi mıborəkə surə 99-ə şərifə ayə ğıyoməti ruji milləti cəm kardey və iştimo,İlahi mığərrəbə firiştə və mələk bıə İsrafili bə Suri(şeypuri)pu kardey bəpeştə bə əməl bome.joqo ki,bın ayədə hamyedə:”və yunfəxu fissuri...və (çoko ki,ğıyomət ome rəse,dıminə pu) kardey be,və əmə həmməy cəm bəkardemon”....

Bə rəvoyəton əsos İsrafili ixtiyorədə firiştəonku iborət qıləy ləşkər heste.qıləy zəmon ki,rostpebemoni ruj nez bıbu,Xıdovənde-Xalıığ bəvon dəstur bəkarde və əmr bəkarde ta çı ğıyoməti ruji zəminə hozzıkon.çəy bəpeştə bəştə suri pu bəkarde,həmmə məxloğat bəmardeyn iyən dınyo bə oxo bərəse.çəy bədiqə ijən sənibəton bəştə Suri pu bəkarde ta həmmə mevcudot iyən məxloğat bəyji bəbeyn və həmmə kəson çı Ğıyoməti səhnədə qırdə və cəm kardey bəbeyn.....