İlahi əsma iyən nomon

İlahi əsma iyən nomon

İlahi əsma və nomonku coqıləyni Ğəni nome.Ğəni nom bənə Xıdovəndi ismi unvoni mıtləğə şikilədə be ehtiyoci mənoədəy ki,çəy mislış ni.həmmə kəsi bəy ehtiyociş heste və bın mənoədə de Xıdovəndi Səmədi ismi qıləy şəbohət iyən nezətiş heste.Səməd qıləy be ehtiyoce ki,qırd məxloğat,hestemon iyən ıştə ehtiyocon çəyku ğəbul kardedə və həmişə iyən həmmə vırədə çəy lutf iyən kərəme.osmonon iyən zəminədə bıə çiyon,bə Xıdovəndi məxsuse.Əv həmmə məxloğati Xalığe və həmən çəvon Malike.

Xıdovənde-Mutəal təmom məxloğati məbdə iyən bəvon əto kardə həmmə kəmolati əto əkəy.har qıləy kəmol ki,dınyoədə mevcude və har qıləy əzəmət ki,bəçəş çiyedə,həmmə kəs çı Xıdovəndi zoti cilvəy və çəy vucudiku sərçeşmə seydən və bo aləmon pərvərdıqori ehtiyocin bıey mənoş ni.Xıdovənd Fatiri mıborəkə surə 15-ə şərifə ayədə hamyedə:”ya əyyuhənnasu....ha millət ha! şıməyon ki,bə Xıdo ehtiyociyon heste və Xıdovənde ki,be ehtiyoc iyən çəy koon həmmə pəsəndidə iyən reçine”.ın ayə Xıdovəndi de mıtləğə ğəni vəsf kardedə və peşo fəğrəti iyən beçizəti bə milləti nisbət doydə və həyğətədə təkid kardedə ki,insonon boştə maddi iyən mənəvi fəğrəti bərtərəf kardero bə mıtləğə Ğəni yəni bə Xıdovəndi ehtiyocişon heste......

Kərimə-Ğıroni ayəonədə Həmidi ism de Ğəni ismi çı be ehtiyoci mənoədə bə ico omə və bandəon yod dənoydə ki,ehanə həmmə insonon noşukrətikon və kofir bıbon,Xıdovənd  Ğəni iyən çəvonku be ehtiyoce və çəvon nunkuyəti və noşukrəti bə Xıdo hiç qıləy zərəl nibərosne.çoko ki,Loğmani mıborəkə surə 12-ə şərifə ayədə hamyedə:”və mən yəşkuru.....və har ki,şukrko,boştə xeyriş kardə və harki kufrko,beşək Xıdovənd be ehtiyoc və bə tarifi loyığe”.həmçinin osmonon iyən zəminədə bıə çiyon,bəy məxsuse və binobərin Xıdovəndi bəştə bandəon sıtoyişi ehtiyociş ni.ehanə Xıdovənd bəştə bandəon çı ibodət iyən pərəstışi əmr kardedə,boçəy xoto ni ki,Əv bəçəvon ibodəti qıləy ehtiyociş heste,bəlkəm ım ibodəton bə insoni mənəvi ruşd iyən ozavziye və bəçəy tərbiyə iyən perəsey boyis bəbe.aləmon pərvərdıqor ıştə bandəonku tələbış kardə ki,əy bızınon və bəy pərəstışko ta bə qıləy mənəvi ruşdi bırəso.çən,həyğətədə bəpe votey bıbu ki,çı ibodət iyən bandəçəti vocibəti,ıştən Xıdovəndi tərəfiku bəçəy bandəon bıə lutfe.

İbreymi mıborəkə surə 8-ə şərifə ayədə omə:”və ğalə Mosə...və Mosə bəştə ğovmi voteşe:ehanə şımə iyən zəmini dimisə jimon kardə həmmə kəson çı ibodət iyən bandəçətiku dast bıkəşon və bə neməton kufrkon,Xıdovənd be ehtiyoc və bə tarifi loyığe.(və bə hiçkəsi iyən hiççi qıləy ehtiyociş ni)......