Bə Həzrəte Fatimə(s)-i şəhodəti aid bıə bərnomə-10

Bə Həzrəte Fatimə(s)-i şəhodəti aid bıə bərnomə-10

Peyğombəre-Əkrəm(s) bə Həzrəte Fatimə(s) bıə məhəbbət çı pıə bə kinə bıə məhəbbət nıbe. peyğombəri(s) coqlə kinonış həm hestebe ki,çə həzrəti jimoni zəmonədə çı dınyoku rehlətışon kardəbe, şıəbin.əmmo peyğombəri(s) bəçəvon hiç qıləyni bə Həzrəte Fatimə(s) nışon doə səviyyədə qıləy məhəbbətış nışon doəş nıbe.qıləy məhəbbət ki,de təkrim iyən ehtıromi bə ico be.

Rəvoyətədə omə ki,ə həzrət ıştə umri oxonə ləzonədə və noxəşəti zəmonədə həzrət Əli(ə),Həzrəte Fatimə(s) iyən çəvon dıqlə zoə fərzənd bıə həzrət Həsən(ə) iyən həzrət Huseynış(ə) vanqış je və bəştə jimoni həmro Ummu Sələmə hamyeşone:Kəy vədə bınışt ta ikəs varid nıbu.peşo Xıdo-Rəsuli(s) bə Əli(ə) hamyeşe:”Ha Əli ha! çımı palu booy.həzrət Əli(ə) bə nez şe.həmonə zəmonədə Peyğombəre-Əkrəm(s) çı həzrəte Zəhro(s) dastış qəte və ıştə sinəsəş noe.peşo deştə coqlə dasti çı həzrət Əli(ə) dastış qəte.qıləy sıxan voteş piyedəbe ki,ars çə həzrəti çəşonku cari be,saru rube və qıləy kəlom bə zıvon vardeyışon nızıne.Həzrəte Fatimə(s) iyən həzrət Həsən(ə) iyən həzrət Huseyn(ə) çı peyğombəri(s) bəmey holətışon mışohidə kardeyədə,de şiddəti əvon həm bəmin.çandə ləzə bəpeşt Xıdo-Rəsuli(s) ıştə səş rost karde və çı həzrəte Zəhro(s) dastış qəte bəsə Həzrət Əli(ə) daston piyo noşe və hamyeşe”ha Əbəl-Həsən ha! ım çı Xıdo iyən Xıdo-Rəsul Muhəmmədi(s) əmonəte ıştı dastədə və çı Fatimə(s) həxədə Xıdo iyən mıni bə yod dənəş.və bə rosti ki,tı jıqo rəftor bəkardeyş.Ha Əli ha! bə Xıdo ğəssəm bıbu ki,Fatimə(s) çı vəhışti jenon səyyidə və banuye.çı sıftəku de tosə oxo bə Xıdo ğəssəm! Fatimə(s) həmonə Məryəme-Kubraye.

Ha Əli ha! Fatimə(s) bətı harçiş fərmon doe,tı əy bə vırə bıroson ki,həyğətən az bə Fatimə(s) koonım bəyon kardə ki,Cəbrəyili əvonış bəmı əmr kardə.Ha Əli ha! bızın ki,mı çə şəxsiku rozim ki,çı kinə Fatimə(s) çəyku roziye və pərvərdıqor iyən məlayikon həm deçəy roziyəti rozi bəbeyn,vay bıbu bo əkəsi ki,bə Fatimə(s) sıtəmış kardə.vay bıbu bo əkəsi ki,çəy həxı çəy dastiku bıstəno.vay bıbu bo əkəsi ki,çəy hurməti darışto.vay bıbu bo əkəsi ki,bəçəy dust və piyəkəsi əziyyət bıdo və vay bıbu bo əkəsi ki,deəy qıləy kin-kudurət və deşmınətiş bıbu”.

Peşo Xıdo-Rəsuli(s) həzrət Əli(ə),Həzrəte Fatimə(s) iyən çəvon dıqlə zoə fərzənd bıə həzrət Həsən(ə) iyən həzrət Huseynış(ə) deçəvon nomi vanqış je və əvonış bəştə dəqəte və bə Xıdovəndi dərqo jıqo ərzış karde:”Bari-İlahi! Mı demon və hakəs ki,bəvon tabe bıbon,sulhım kardə və bəçımı ehdəy ki,əvoni bə vəhışt daxilkəm və hakəs deəvon canqko və bəvon sıtəmko və ya çəvonku bənav dəşo ya çəvonku bə dumo mande,az çəy deşmınim iyən deəy çanq kardə holədəm.bə Xıdo ğəssəm! Ha Fatmə(s) ha!rozi nibədem tayinki,tı rozi bıbuş.ne bə Xıdo ğəssəm! Rozi nibəbem illa ki,tı rozi bıbuş”........

İmom Əli(s) çı Həzrəte Fatimə(s) pokə bədəni deştə daston bə ğəb noey bəpeştə,i tərəfiku bə İslomi banu əzəməti dəlili xoto və co tərəfiku həm çı Həzrət Əli(ə) norohətçəti şiddəti nışonə be ki, çəy jimoni həmro çəyku co bıəbe,qıləy sıxanonış bəyon karde.İmom Əli(s) ıştə kəlomədə bə həmməysə vey çok və vey mınosibə mıxotəbi yəni bə Xıdo-Rəsuli(s) xitob kardedəbe,deəy dardı-dıl kardedəbe və ıştə sıxanış jıqo binoş karde:”dorud bıbu bətı ha Xıdo-Rəsul (s) ha! muku səlom bıbu iyən ıştı kinəku ki,hejo ısət ıştı palu ome və vey rə bətı umuj qıniye”.

İmom Əli(s) ıştə sıxanon dəvomədə bə Xıdo-Rəsuli(s) xitob kardedə və ərz kardedə:”Ha Xıdo-Rəsul (s) ha! ıştı kinə firoğiku həni səbrım mandəni iyən ıştə tağətış çı dasto doə”.peşo İmom Əli(s) de bə həmməysə dıjdə ğəmi ki,hejo çı Peyğombəre-Əkrəmi(s) ıştən rehləte,işorə kardedə və hamyedə:”əmmo bəştı dıjdə ğəm və mısibəti  iyən odəmi dıli sutunə coəti dığğət kardeyədə,bomı qıləy təsəlli iyən oroməti vırəş noə.zira mı deştə daston tınım çı ğəbi poə bıə vırədə nome və ıştı ruf çımı xılx iyən sinəku pərvoz kardeşe,pəre.bəle və əmə həmmə Xıdo tərəfikumon iyən bəçəy səmt obəqardemon”.....