İlahi əsma iyən nomon

İlahi əsma iyən nomon

İmom Rızaku(ə)qıləy rəvoyətədə çı Xıdovəndi bə Nuri bıə təşbihi illət iyən səbəbiku sıvol kardey be ki,ə həzrəti jıqo hamyeşone:Hadin liəhlis-səmayi və hadin liəhlil-ərzi.Əv osmonon əhli iyən zəmini əhli hidoyətəkəy”.de qıləy co iborəti Xıdo nur osmonon iyən zəmini və çəvon əhli bə əsliyə hədəf iyən məsədi hidoyət kardedə,rosneydə.əmmo odəmi dığğəti cəlbəkə çi ıme ki,bızınəmon həmonə nur ki,bə bəşəriyyəti oxonə hidoyəti boyis beydə,movud iyən və`də doə bıə Munci iyən Xilıoskori nure.həmonə Munci ki,İlahi həmmə dinon çəy intizorədən.bənə Xıdovəndi oxonə zəxirə iyən ehtiyoti unvoniye və çə həzrəti nuri şua jiyədə dınyo bə həyğiyə kəmol iyən hərəbaxtəti bərəse.

Xarəməl-Əvsiya(əc) Nur qıləy nicot baxşəkə nure ki,de İlahi mıtləğə nuri əbədi iyən feyzdoə mənbə qıləy penıssiyə rabitəş heste,çı Xıdovəndi cəmol iyən cəloli təcəlliye.həmonə şəxs ki,simvolik surətədə çı sipiyə asbi piyoe ki,bo bəşəriyyəti sulh iyən oroməti nışonəy,zohir beydə.çoko ki,nuriku bıə qıləy şımşiş dastədəy və zumandə ğarətgər iyən mıstəkbiron ki,insoni resurson iyən maddi və mənəvi cəhəto zəyif kardey bıən iyən benəvoə şəxson məhf kardəşone,çəvon mol-əmvolışon ğarət kardə iyən bə zılləti dıço kardəşone.həmonə şəxs ki,bə zolımon sıtəmi xoto zəyif bıə benəvo və səfilon sə dast dəsyu,əvoni nəvazişko və qıləy hevujə rəhmətış heste.həmonə şəxs ki,ozodəti,aqahəti iyən ədoləti mesaj iyən peyğomi vardedə və deştə əzəmətinə ğıyomi Beynəlxalğə Vohidə hukuməti  bə formə dəbənoe və dınyoədə çı bıvəti iyən bərobərəti bina ğoym bəbe və çı Xıdo bandəon norohəti,noəmni iyən muşikoloton bə oroməti iyən əmniyyəti təbdil bəkarde.və bilaxirin çı Nuri hakimiyyət çı dınyo qırd vıronədə cilvə pəydu bəkarde.......

Kərimə-Ğıron ım İlahi kəlom ki,çı bəşəri rahnuma iyən hidoyəti ko deştə kəlmə,ayə iyən surəon əncom doydə,həmçinin de nuri tevsiif beydə,Mayidə mıborəkə surə 15-ə şərifə ayədə omə:”Ğad caəkum....bəle Xıdovəndi tərəfiku nur iyən oşkoə kitob bəşmə səmt ome”.ziyodə təfsiri kitobonədə omə ki,çı nur iyən kitobiku məğsəd həmonə Kərimə-Ğırone.zira peşonə ayədə hamyedə:”Yəhdi bihi ......Xıdovənd de Ğıroni bərəkəti deştə dıli bəy tabe bıə kəson bə səhih iyən səlomətə roon hidoyət bəkarde”.həlbəttə Tevrat iyən İncil cə coqlə osmoniyə kitobon həm çı təhrifi bənav nur iyən ruşinəkə bıən və Xıdovəndi əvonış hidoyətəkə təğdımış kardə.çoko ki,Mayidə mıborəkə surə 44-ə şərifə ayədə de oşkoə formə hamyedə: ”İnna Ənzəlnahu....Əmə Tevratımon nozil kardemone ki,bəvədə hidoyət və nur hestebe və peyğombəron ki,çı Xıdo fərmoni mığobilədə təslim bıən iyən deəy bo yəhudiyon hukm iyən ğəzovət kardedəbin”.....