İlahi əsma iyən nomon

İlahi əsma iyən nomon

Qıləy Xıdo ki,əzəmət,kibriya iyən izzətədə mislış ni.qıləy əbaxş ki,deştə ədoləti harçiş çəy vırədə mustəğərrış kardə və deştə fəziləti harkiş bıpyo hidoyət bəkarde.çoko ki,İsra mıborəkə surə 97-ə şərifə ayədə hamyedə:”və mən yəhdilllahu fəhuvəl muhtəd”.Xıdo harki rahnumako,həyğətən hidoyətış pəydu kardə”.

İlahi əsma və nomonku coqıləyni həm Hadi ism iyən nome.Hadi çı huda rişəku və bo həxı nışon doey iyən rahnumaro bənav dəşey mənoədəy.hidoyət həm çı irşod iyən rahnuma,ruşd,kəmoli roy bəyon və bə kəmoli ğullə rəseyro zəminə hozzı kardey məniodəy.Hadiyə Xıdo qıləy bəsirə Xalığe ki,ıştə həmmə məxluğatış bə oxonə kəmol iyən məğsədi ki,boçəy xoto əvon ofəyən bıən,rosneydə və hidoyət kardedə. Xıdovənde-Xalığ Taha mıborəkə surə 50-ə şərifə ayədə bə kulli mevcudoton ım hidoyəti işorə kardedə və hamyedə:”ğalə rəbbuna...voteşe:çəmə pərvərdıqor həmonə kəse ki,harçi mıtənosibə hestemonış bəy doə.peşo əvış bə kəmoli roy hidoyətış kardə”.ıbə m nev hidoyəti təkvini hidoyət və ya umumi hidoyət nomış noə .qıləy nuyə zand ki,tojə bə dınyo omə,tıbğe təkvini hidoyəti,ıştə inə və moə sinə bəştə qəv qətedə və və bə təkvini hidoyəti əsos bo şıt hardero çə həmonə sinəku didə və sayirə.....

İlahi hidoyət bənə sayir mənəvi koon mıxtəlifə mərtəbə iyən dərəcəonış heste və pərvərdıqore-aləm de çandə nev hidoyəti ısət çı təkvini bıbu ya təşriyi insoni bə ruşd iyən kəmoli səmt vanq jeydə.təşriyi hidoyət ıme ki,Xıdovənd bə bəşəri irodə iyən ixtiyorış doə və çəy kəno bəy fik iyən ağlış həm əto kardə. Im ro bə insoni çok iyən bədə roy,həx iyən botılə roy və rəvo iyən norəvo nışon doydə və əvış ıştə roy vıjniyeyədə ozodış haştə.Xıdovənde-Aləm ənbiya iyən peyğombəronış vığandə ki,bəşəri de təşriyi roy vositə hidoyətko.əvon çı fərd iyən camiyə islohi royışon bəyon kardə və milləti bə Xıdovəndi itoət,ibodət,infoğ,ədolət,bə pı-mo ehtırom kardey.sileyirəhm,bə cokəson həx-huğuğon rioyət kardey səmt dəvət kardedən.həlbəttə çın hidoyəti kəsbi tovfiğ iyən ovandəti bə kəson şomil beydə ki,çı hidoyəti mığəddimə iyən vəsəş boştəş hozzı kardə.de qıləy co iborəti ə kəson çı Xıdovəndi məxsusə hidoyətiku bəhrə bəbardeyn ki,həyğəton tələbkon və çəy dumo bıbon və ıştə ğəlbon bo həyğəton məsey iyən vindeyro ojkon.....

Xıdovənde-Xalığ Kərimə-Ğıroni mıxtəlifə ayonədə bəyonış kardə ki,hidoyət bəy məxsuse.min cumlə ın ayəon Bəğərə mıborəkə surə 120-ə şərifə ayəy ki,hamyedə:”ğul innə hudəllahi...vuji:hidoyət fəğət çı Xıdovəndi hidoyəte”.liza İlahi əvliya iyən ənbiya həm bənə İlahi hidoyəti unvoni Xıdovəndi ıştən tərəfiku bo hidoyətiro məmure.çoko ki,pərvərdıqore-aləm Cəjdə mıborəkə surə 24-ə şərifə ayədə jıqo hamyedə: ”və xələğna minhum əyimmətən yəhdunə biəmrina”.və çəvonku imomon(və rəhbəron) ğərol domone ki, deçəmə fərmoni (milləti) hidoyət kardedəbin”.binobərin hətto İslomi mukərrəmə peyğombər)s) həm bo hidoyətiro yeqanə vositəy.bəçəy xoto Xıdovənde-Aləm Ğısəsi mıborəkə surə 56-ə şərifə ayədə bə peyğombəri(s) xitobən hamyedə:”innəkə la təhdi mən..... .....ha peyğombər ha! tı ıştə piyə ikəsı hidoyət kardey nibəzıneyş,əmmo Xıdovənd ha kəsi bıpyişe hidoyət bəkarde iyən Əv hidoyət pəydu kardə kəsonku vey aqahe”.