İlahi əsma iyən nomon

İlahi əsma iyən nomon

Xıdovənde-Xalığ Kərimə-Ğıroni mıxtəlifə ayonədə bəyonış kardə ki,hidoyət bəy məxsuse.min cumlə ın ayəon Bəğərə mıborəkə surə 120-ə şərifə ayəy ki,hamyedə:”ğul innə hudəllahi...vuji:hidoyət fəğət çı Xıdovəndi hidoyəte”.liza İlahi əvliya iyən ənbiya həm bənə İlahi hidoyəti unvoni Xıdovəndi ıştən tərəfiku bo hidoyətiro məmure.çoko ki,pərvərdıqore-aləm Cəjdə mıborəkə surə 24-ə şərifə ayədə jıqo hamyedə: ”və xələğna minhum əyimmətən yəhdunə biəmrina”.və çəvonku imomon(və rəhbəron) ğərol domone ki, deçəmə fərmoni (milləti) hidoyət kardedəbin”.binobərin hətto İslomi mukərrəmə peyğombər)s) həm bo hidoyətiro yeqanə vositəy.bəçəy xoto Xıdovənde-Aləm Ğısəsi mıborəkə surə 56-ə şərifə ayədə bə peyğombəri(s) xitobən hamyedə:”innəkə la təhdi mən.....ha peyğombər ha! tı ıştə piyə ikəsı hidoyət kardey nibəzıneyş,əmmo Xıdovənd ha kəsi bıpyişe hidoyət bəkarde iyən Əv hidoyət pəydu kardə kəsonku vey aqahe”.binobərin ehanə ğərəz Xıdo bə ikəsi Hadi şomil bıbu,bəçəy xotoye ki,Əv çı Hadi ismi məzhər və ya hidoyətədə vositəy və Hadi ism çəy vucudədə təcəlliş pəydu kardə.çoko ki,əgər bə inson, alim,ğadir,kərim,cəvad və sayirə şomil bıbu,bə ın cəhəti xotoye ki,çı həx-təala ım ismon bəvədə zuhurış kardə......

Kərimə-Ğıron ım osmoniyə kitob çı Xıdovəndi tərəfiku bo bəşəri hidoyıtiro nozil bıə.Xıdovənd bın şərifə kitobədə bo bəşəri hərəbaxtəti iyən hidoyətiro lozım bıə har qıləy çiş bəyon kardə.əmmo insonon çı İlahi hidoyəti mığobilədə bəçəvon malik bıə ixtiyori əsos,dı curnə əməl kardedə.kali qıləyni çəy mığobilədə çı itoət iyən təslimi roşon vıjniyə və bəzi qıləyni həm de tuğyongərəti məşğul bıən.bəçəy xoto əmə de Xıdovəndi hidoyəti coqlə nevi dimbədim omeydəmon ki,ım həm çı mıttəğiyon məxsusə hidoyəte.yəni ehanə Kərimə-Ğıron bo həmmə insonon hidoyətiro nozil bıə,əmmo pərhizkoron iyən mıttəğiyon məxsusə şikilədə çəyku bəhrə bardedən.Bəğərə mıborkə surə dıminə şərifə ayədə jıqo omə:”zalikə...-ım kitob de qıləy əzəmətiye ki,bəvədə şək ni və bə pərhizkoron hidoyəti boyis beydə”.ın ayə və coqlə ayəon Kərimə-Ğıroni funksiyə və əməli çı bandəon hidoyəte.Kərimə-Ğıroni yolə mıfəssır iyən təfsırəvon bıə Əllomə Muhəmməd Huseyn Təbatəbayi ıştə Əlimzon təfsir kitobədə çın şərifə ayə zeylədə jıqoş nıvıştə: ”mıttəğiyon dıqlə hidoyəti miyonin ki,iminə qıləyni ıştən hesteşone iyən dıminə qıləyni Xıdovəndi bənə təğva mıkofti unvoni bəvon ətoş kardə və ım dıminə hidoyət de Kərimə-Ğıroni vəsilə iyən vositə bə əməl omeydə”.əmmo vey reçin iyən bə dıl nıştə nuktə ıme ki,mehribonə Xıdovənd bo çın hidoyətiku bəhrə bardero peşonə ayəonədə çı mıttəğiyon xısləton bəyon kardedə və hamyedə:”(mıttəğiyon ə kəsonin ki) bə ğeybi(aləmi) imonışon heste və nımoji bərpo kardedən iyən çəmə bəvon ruzi doə çiyonku infoğ kardedən və (əlləzinə) və əvon ki,bətı iyən bəştı bənav nozil bıə çiyon imonışon heste və əvonin ki,bə axırəti yəğınışon heste.(vəlləzinə yum)əvon çəvon pərvrədıqori tərəfiku bıə qıləy hidoyəti soybin və bə rosti (əvon)həmonə nicot pəydu kardə kəsonin.(ulayikə....)..............