Asiyə ğərbədə xəbəon

Asiyə ğərbədə xəbəon

ım bərnomədə çand qılə vey muhimmə mıvzoon barədə ki dəvardə haftədə hodis bıə sıhbət bəkamon, ım mıvzoon əcumlə: Tırkiyə iyən Suriyədə 7.8 (haft tam daku həşt) rixter stajış nıbıə  buməlarzə, Muhəmməd İbne Səlman muxalifətədə, Hicazi parlamenti təsis və həmçınin Əriha şəhrədə Fələstini tojə muğaviməti qrupi icod bey mıvzoon şomilin.

Əmmo dəvardə haftədə, Suriyə iyən Tırkiyədə 7.8 rixter buməlarzə omə bıə ki bə oxonə statestikaon əsos, ım hodisədə təğribən 25 həzo nəfər kışte iyən 100 həzo nəfər zəxmin bıən. Həmçınin həminə buməlarzə cərəyonədə, Suriyədə 3500 nəfər kıştə bıən ki həlbətə de diğğət bə ım ki həmçınan xərobəon peqətey dəvomış heste, Tırkiyə iyən Suriyədə kıştə bıə kəson mığdor çımiku həm vey bəbe.

Tojə buməlarzə hodisə co kərə çı ğərbi insoniyə həxon 2curnə standardon subitış kardə. Suriyə dıvlət ıştə həmmə cəhdon əncom dodə ki bəştə kişvəri buməlazə vində kəson komək ko, əmmo de ım vucud, bə buməlarzə vində kəson imdod rosniyero, Suriyə iyən Tırkiyə şəroyet bərobər ni, boçi ki təğribən 12 sor bəbe ki Suriyə canq iyən sanksiya şəroyetədə ğərorış qətə, əmmo Tırkiyə de ım şəroyet dim bə dim ni və Avrpoa dıvləton həm ıştə iminnə koməkon bə Tırkiyə kişvəri məxsus vığandəşone.

Xəbə omə Suriyə xarıci vəzir, Feysəl Əlmeğdad de Əlməyadin xəbəiyə kanali mısohibə cərəyonədə votışe: faciə vey yole, həmonə çi ki ım faciə vey hevujış kardə ım məsələy ki Suriyə de terrorist iyən terrorizmiku himoyəkəyon canqədəy. Sanksiyaon həm ım faciə vey kardəşe. Amerkə sanksiyaon bois bıə ki Suriyə həmmə çiku məhrum bıbu hətto damon hıryeyku!

Hətto İ  bıə milləton pənohəndəon ali kamissiya sıxənəvot, Rola Emin tojədən həminə məsələ barədə votışe: bəpe siyasi məsələon bə kəno noey çərçivədə bə Suriyə zəxmin bıə kəson komək bıbu.

Im tənğidə sıxənon bəpeşt, cımə rujədə Amerkə maliyə vəzarətxonə qıləy umumiyə lisenziya muntəşirış kardə ki bə çəy əsos, 180 ruji mıddətədə, bə buməlarzə imdodi vabəstə bıə koon iyən mıomiləon icozə doə bıbu, əmmo Suriyə xarıci vəzir, Amerkə dıvləti ım ğəroli fəğət qıləy insoni duə hisson pesoxtə nımoyeş, zıneydə.

Amerkə prezident Co Bayden ım yolə faciədə hətto de Suriyə milləti ıştə hamdardi elanış nıkarde iyən ıştə Tvittədə nıvıştəş be: həmmə vabəstə bıə təşkilatonku tələb kardəm ki neziku de Tırkiyə həmohənqi, buməlarzə vində kəson vəziyəti dumoədə bıbun və lozimə imdodon əncom bıdən.

Suriyə prezident, Bəşşar Əsəd həm buməlarzə bəpeşt, ıştə sıxənonədə ğərbi kişvəronku tənğidış kardə.

Xosə əməson, dəvardə haftə co qılə vey muhimmə xəbəon ım be ki de Ale-Səud xəbisə planon muğabilə kardeyro, Səudi əktivə şəxson Hicaz sərzəminədə və mısılmonon muğəddəsəçiyonku mudafiə kardey cəhəto, Hicazi parlamenti təsis kardışone.

Milodi 2017 minnə sorku Muhəmməd İbne Səlman bənə Sıudi Ərəbistoni vəliəhd hukumət kardedə. Əv Oxonə soronədə bəzi hərəkətoni əncomış doə ki dəvardəku vey Ərəbistoni islomi şəxsiyəti məhv kardey bois bıə. Həğiğətədə Muhəmməd İbne Səlmani koon iyən hərəkəton bois bıə ki Ərəbistoni islomi şəxsiyət əvəz bıbu,  Avstraliya jurnalist, Si Ci Verlmən qıləy filmi ıştə Tvitterədə muntəşirış kardə iyən bəvədə votışe: Səudi dıvlət nə fəğət bə təbliğəkəyon ələyh canqi binoş kardə bəlkəm de islomi binaon həm canqış heste.

Hicazi parlamenti yol, Sultan Ələbdoli votışe: İbne Səlman de mıstəbıdonə bəhonəon Cəddə milləti icborış kardə ki mıhocirət bıkon və ısət 100 həzo nəfər həminə icbor bıə kuçədə ğıboni bıən.

Ələbdoli ijən əlovəş karde: çəmə məsələ təğribən 2 milyard mısılmoni barədəy, boçi ki İslomi şəxsiyəti oqətey barədə sıhbət kardedəmon. Ehanə sukut kəmon, islomi ummət yolə təhdidi mığubilədə bəbe və ehanə oqohəti məbu,hiç qılə hərəkəti icod nibəbe, və çəmə ğudrət muğəddəsəçiyon mudafiədə islomi umməti həmmə hərəkətonədəy.

Çımiku bənav həm Sultan Əbdoli de “Hicoz təhdidədəy” nomo bıə Həştəqi onvan bə ərəbə millət notaş doə be ki İbne Səlmani hərəkəton vədə sukut kardey bois bəbe ki Məkkə iyən Mədinədə islomi irson məhv bıbun iyən Ohodi band bə yəhudiyon pənohqoh əvəz bıbu.

Səmimi əməson, Əriha şəhrədə Fələstini Həmas hərəkəti hərbi qruponku qıləyni, bə Əğəbətol Cəbər məşhur bıə dastə təsis bey, dəvardə haftə Asiya ğərbədə co qılə xəbə be ki çəy barədə sıhbət bəkamon.

Cənin ordoqohədə Sionist rejimi ərtışi cinoyəton bəpeşt, ki çəy cərəyonədə 9 nəfər şəhid iyən 20 nəfər zəxmin bıən, Baxtəri tanqə muxtəlifə şəhronədə həminə həmlə cəvobədə, de Fələstinıjon vositə çand qılə silohinə əməliyaton əncom be, ki çəy nımunə Xeyri Əlğəm 21 sor sinnış bıə cıvon be ki coyli surətədə 9 nəfər sionisti həlokış karde.

Dəvardə 1 sori mıddətədə Fələstini şəhronədə, muğaviməti tojə qrupon icod bey bə sionist rejimi kabus əvəz bıə. Ərinol Əsvəd ya şiron vişə, vey muhimmə qruponku qıləynie ki Nablusədə icod bıə, dəvardə 1 sori mıddətədə ım muğaviməti qrup, bə sioniston ələyh vey əməliyaton icroəkə amil be əcumlə işğol bıə sərzəminonədə.

Isət Ərihaədə, Əlğəsam qruponku qıləyni təsisi şoyd hestimon. Ərihaədə ım qrupi təsis boçimi xoto əhəmiyyətış heste ki dəvardə soronədə və sionist rejimiro, Baxtəri tanqədə, Əriha bənə oromə şəhr məşhur be.

Bə muntəşir bıə xəbəon əsos, Əğəbətol Cəbər nomo bıə tojə qrup, bə Həmasi hərbi qrup yəni Ezzuddin Ğessam qrupi vabəstəy. Və ım məsələ sionist rejimi ərtış və ım rejimi əmniyyət və kəşfiyoti hərbiçionro 2 qılə cəhətiku çəş nıkardə bin be. İminnə ım ki həminə qrupi mucud beyku bənav, çəyku hiç məlumat nıbe və 2minnə ım ki sionist rejim ıştə həmmə diğğəti bə islomi cihodi hərəkət cəlb kardəş be və zınəş nıbe ki Həmas həm karde bəzne bənə İslomi cihodi, tojə silohinə qrupon təsis bıko.