İlahi əsma iyən nomon

İlahi əsma iyən nomon

Qıləy muminə inson de Bağiyə Xıdo de bə fəno məhkum mandə ilahəon mığoyisədə dərəseydə ki,fəğət Xıdovənde-Mutəol  bo hukumtə və rəhbərətiro qıləy ləyoğətış heste.boçi ki,bəpe çı insoni məbud iyən bəçəy fəryodi rəsəkəs baği iyən əbədi bımando ta hejo və qırd ləzəonədə bəy rəsə zərəli bə diyəro kardey bızıno və həmçinin çəy mənfəəti təmin kardey bızıno.qıləy mıvəhhid iyən vohidə Xıdo pərəstə inson həzrəte İbreymi(ə) boştə ulqu ğərol doydən və bənə ə həzrəti çı Bağiyə Xıdovəndi dumo bıbu.əve bənə ə həzrəti vanq jeydə:az ğurb kardə çiyonım piyedəni iyən əvəz bıə,bə zəvoli məruz mandə iyən bə fəno mıəhkum bıə çiyon pərəəstış iyən sıtoyiş kardedənim.”....

Kərimə-Ğıroni termin iyən istilohonku qıləyni,”bağiyatis-salihot” termine.bağiyatis-salihot ə əməlonin ki, çəy səvob bo insoni baği mandedə.həmçinin Xıdovəndi nəzdədə qıləy ziyodə əhəmiyyət iyən erjış heste və ımon bo həmməysə çokə mıkofoti rəseyro qıləy roon.Xıdovənde-Xalığ Kəhfi mıborəkə surə 46-ə şərifə ayədə hamyedə:”əlmalu və bənunə.....mol iyən fərzəndon çı dınyo jimoni ziynət iyən zivəre və salehə əməlon ki,(tosə ğıyoməti) bağiye,ıştı pərvərdıqori palu qıləy veyçokə mıkofotış heste və bo bəçəy rəhməti dast pəydu kardeyro vey umubaxşəkəy”.bın dınyoədə mol iyən fərzəndon çə cumlə koonkuye ki, bo insoni dərostə bıə və çı insoni ğəlb bəvon muştoğ iyən meylış heste və çəy oruzuon bəçəvon mehvər iyən mərkəzi əsos qardedə.əmmo ımon rədəvardə koonin ki,insonon çəvonku çəş kardə mənfəəton iyən amalon hosil  nibəbe.qıləy holədə ki,saleh iyən ləyoğətinə əməlon  bo insoni çı Xıdovəndi nəzdədə məhfuze iyən boəy baği bəmande.

Həmçinin Xıdovənde-Aləm Məryəmi mıborəkə surə 76-ə şərifə ayədəjıqo hamyedə:”və yəzi dullahulləzinə....və Xıdovənd əkəson ki,hidoyətış pəydu kardə.çəvon hidoyəti ziyod bəkarde və əbədi mandə çokiyon ıştı pərvərdıqori nəzdədə mıkofoti cəhəto veyçok iyən veyğaneəkəy”.

Çoko ki,zıneydəmon çın dınyo həmmə ləzzəton iyən mol-devləton bə fəno iyən zıvoli səmte.çən,bın dınyoədə həmməysə vey ağılmandə ko fəno bə baği təbdil kardeye və şayəd həmməysə vey çokə ko ıme ki,odəmon çanədə kardey zıneydən Xıdo royədə cobfışonətikon.ım nisor iyən coniku dəvardey həyğətədə yəni çiçı heste bə kəmol iyən hərəbaxtəti rəsey royədə sərf və xarc kardey.zira Xıdo nəzdədə ki,çı baği,ruşd,feyz iyən bərəkəti aləme,çı çokəti neviku bıə harçi,ləzə bə ləzə ziyod beydə.həlbəttə vazeh iyən oşkoe ki,fəno bə baği təbdil kardey,bə sədəğə,xeyrot,səxovət iyən baxşeşi məhdud ni,bəlkəm qıləy vəxt şəxs həxə koyədə deştə dıli ımi kardedə və deştə əhd-peymon bastedə ki,çı Xıdo roziyəti cəlb kardey koyku xaric nıbu və bə ım əhdi əməlko,həni harçi əncom bıdo və bə vırə bırosno,baği bəmande.....