De Rəsuli-Əkrəmi(s) Besəti ruji mınosibəti

De Rəsuli-Əkrəmi(s) besəti ruji mınosibəti

Xıdo kə Kəbə xərob kardeyro bə Məkkə səmt omə şatursuvarə ləşkəri mecuzəvi surətdə məhf bıey zəmoniku 40 sor dəvardeəbe ki,bın mığəddəsə şəhrədə qıləy coqlə dıjdə mecuzə bə əməl ome.Rəcəbə manqi vistı haftminə şəvi vaxti qıləy holədə ki,millət hanədə bin və həzrət Muhəmməd(s) bəştə harujnə adəti əsos bə Hira bandı-ku şıəbe ta deştə pərvərdıqori razo-niyoz iyən ibodəti koy məşğul bıbu.ğəflətən İlahi mığərrəb iyən yolə mələk bıə Cəbrəyil-Əmin(ə) çı Xıdovəndi ım mahbubə bandə mığobilədə zohir be,mande və bə ə həzrəti mıjdəvoniş doe ki,əv bo bəşəri hidoyətiro bənə İlahi oxonə vığandə bıə peyğombəri unvoni vıjniyə bıə.de ın tərtibi çı bəşəriyyəti torıxi həmməysə dıjd və tale həlləkə hodisə ki, çı milləti bə Xıdopərəstəti,mənəviyyoti iyən insoni fəziləton səmt qıləy nuyə fəslış ojış karde ki,qırd de rəhmət.nuroniyyət iyən heyrətamizə fəzo pur be.bənə coqlə peyğombəron çı İslomi azizə peyğombəri(s) İlahi məmuriyyət milləti bə Vohdiə Xıdo pərəstəti səmt dəvət iyən harcurnə botılə mə`budon nəfy iyən inkor kardey be.çoko ki,Nəhli mıborəkə surə 36-ə şərifə ayədə handedəmon:”əmə har qıləy ummətədə qıləy rəsul vıjnemone(ta bə məxloği bıvoto) Vohdiə Xıdo pərəstışkənən iyən çı tağutonku iştinobkənən”. əmmo İslomi azizə peyğombəri(s) mığobilədə bo ın dıjdə vəzifə bə vırə rosnero ziyodə maneyəon iyən saxtə muşkiloton mevcud be ki,min cumlə çəvonku camiyədə hakim bıə nodonəti,xorafatpərəstəti iyən fəsod be.həzrət Əli(ə) həmonə zəmonə beəxloğə vəzyəti jıqo tevsif kardedə:”Xıdovəndi peyğombərış bə zəmon vığandeşe ki,millət çı zəloləti vadiyədə heyron bin iyən ıştə roşon qim kardəbe və kurkuronə surətədə fitnəonədə bin.nəfsoni həvəson çəvon ağlonış dızdiyəbe.təkəbbırəti,xudpəsəndəti iyən eqoyizmi əvonış bə fırsemoni dıçoş kardəbe və toykiyə cohliyyəti əvonış sıvıkəsə iyən be etıbo kardəşbe. no orom iyən sərqərdonə koonədə iyən bə nodonəti giriftor bıə qıləy millət bin.(bın zəmon)həxə Rəsulullah(s) ıştə bəvon nisbətədə bıə xeyrxahətiş bə oxoş rosne,bə həxə roy səmt hərəkətış karde və əvonış bə hikmət iyən həsənə və çokə moyizə səmt dəvətış karde”.......

Rəsule-Əkrəm(s) Kərimə-Ğıroni çərçivədə bənə oxonə iyən komilə osmoniyə kitobi unvoni,bo bəşəri bə dınyəvi iyən uxrəvi hərəbaxtəti səmt hidoyətiro qıləy hartərəfinə bərnoməş bə ərməğon vardeşe.Cumə mıborəkə surə dıminə şərifə ayədə bın barədə jıqo omə:”Əve ki,milləti miyono çəvon ıştəniku dərs nıhandə qıləy peyğombərış məbus kardeşe ta İlahi ayəon boəvon bıhando iyən əvoni (nopokətiyonku) pokko və bəvon kitob iyən hikmət omuto.harçənd əvon çımi bənav qıləy oşkoə zəlolətədə bin”.həzrəte Muhəmmdə(s) ıştə 23 sornə peyğombərəti zəmonədə qıləy millət ki,çı şırk,cəholət,fəsod,xorafat,canq iyən hoziyəti qırdəovədə bin,kardeyış zıne əvoni bə Vohdiə Xıdo pərəstəti,pərhizkorəti,sulh,bıvəti iyən dustəti səmt hidoyətko.həlbəttə ə həzrət bın royədə ziyodə saxti iyən zəhmətonış kəşe və bə veyə muşkiloton tov vardeşe.əmmo ə həzrət əy bə istiğoməti səmt vanq jıə de İlahi fərmoni dılış qam be və bəvon əməl kardedəbe.Xıdovəndi oxonə peyğombər jıqo dıləsut be ki,Xıdovənde-aləm ıştən Kərimə-Ğıronədə ə həzrəti bənə”bo həmmə aləmi qıləy rəhmət” unvoni zikr kardedə və çı Şuəra mıborəkə surə seminə şərifə ayədə bə həzrəti xitobən hamyedə:”(Ha pəyğombər ha!) jıqo bızon bə mışrikon imon nıvardey xoto,(ğəmqinəti şiddətiku) dılı heste ıştəni həlokkoş”.Xıdo-Rəsuli(s) çı deşmınon mığobilədə bıə səy,tədbir iyən mehribonətiyon oxoyədə boyis be ta Ərəbıstoni nimələpəkədə jiyə millət çı şırk iyən cohiliyyətiku bə İslomi nuroniyə dini səmt dim bıqəton.həlbəttə şək ni ki,çəvon həmmə bə Xıdo iyən bəçəy pəyğombəri bıə imon i əndozədə nıbe.çəvonku kali qıləyni ıştə etığodonədə ğoym iyən mehkəm və bəzi qıləyniyon həm sıstə imoni soyb bin və bəziyon həm zohirədə mısılmon,əmmo çı ğudrət iyən sərvəti dumo bin....