İlahi əsma iyən nomon

İlahi əsma iyən nomon

Kərimə-Ğıroni mıxtəlifə ayəonədə çı aləmi mevcudot iyən məxloğati həmd iyən təsbihiku ziyodə sıxan bə miyon omə.həmməysə oşkoə qıləyni İsra mıborəkə surə 44-ə şərifə ayədə omə ki,hiç qıləy istisno nıbə holədə çı hestemoni aləmi həmmə məxloğat,zəmin,osmon,astovəon iyən qalaktikəon,insonon,heyvonon iyən çı doon livon və hətto atomi hırdə zərron həm bın umumi həmd iyən təsbihi koyədə şərik zıneydə. joqo ki,Xıdovənde-Xalığ bın ayədə jıqo hamyedə:”tusəbbihu ləhu...... həmmə haft qılə osmonon iyən zəmin və çəvon miyon bıə mevcudot əvon həmmə əy mınəzzəh (pok) zıneydən və usulən hiç qıləy mevcudot ni ki,inev de həx-təala həmdı-səno iyən sıtoyişi koy məşğule. əmmo fəğət ə alimon ki,çəvon ğəlb iyən conon de nur iyən imoni bəyi iyən ruşine,ın sədo deştə coni quşi məseydən iyən dərk kardedən.

Təsbih de qıləy co bəyoni yəni Xıdo zikri bə vırə rosneye.zikr luğətədə yod kardey mənoədəy.ısət de zıvoni bıby və ya de ğəlbi har dıqləyni mənoədəy.Kərimə-Ğıronədə həmməysə ziyodə dəstur iyən əmr doə bıə zikr və hətto bə peyğombəre-əkrəmi(s) vocib bıə “Subhanəllah” zikre.ım zikr ruku,səjdə iyən çı nımoji seminə iyən çominə rıxətədə,bəsə coqlə zikronsə vey omə.Təsbihate-Ərbəəədə çı nımoji seminə iyən çominə rıxətədə jıqo votedəmon:”Subhanəllahi ....Xıdovənd pok iyən mınəzzəhe və həmdo-sıtəyiş bəy məxsuse və Xıdovənd çı vəsf kardeyku vey yole”.odəmi dığğəti cəlbəkə çi ıme ki,iminə kəlmə “Subhanəllah” kəlmə omə.bəın cəhəti xotoye ki,təsbihəkə sıftədə Xıdovəndi çı harcurnə noxsan ki,bə insoni zehni omeydə,mınəzzəh iyən pok zıneydə.çoko ki,”Allahu-Əkbər” ki,Xıdo həmməysə yole-mənoədəy,ım yolyti de qıləy çi nisbətış ni və vəsf bıənin ni.qıləy rəvoyətədə omə ki,İmom Sadığ(ə) çə həzrəti palu ” Allahu-Əkbər” votə kəsiku dəparseşe:Xıdo kom çiysə vey yole?həmonə şəxsi voteşe: ”Xıdovənd çı harçisə vey yole”.İmom Sadıği(ə) hamyeşe ki,bın surətədə tı əvı məhdudış karde.çıro ki,har qıləy məxloğ har çanədə yol həm bıbu,məhdude”.liza Subhanəllah yəni bəpe Xıdovənd çın yol hisob kardə bıə çiyonku(təkbir voteyku)mınəzzəh vindey bıbu və çunki,Xıdovənd mınəzəh iyən mığəddəse,bo sıtoyiş iyən həmdiro loyığe.bəçəy xoto ımi Təsbihate-Ərbəəədə bilofosilə çı ”Subhanəllahi” bəpeştə de Əlhəmdulillah zikri çın neməti şukri bə vırə rosneydə....