İlahi əsma iyən nomon

İlahi əsma iyən nomon

İlahi əsma və nomonku coqıləyni Mustəani nom iyən isme.ım ism çı “Ovni” rəğ-rişəku çə kəsi mənoədəy ki,bəy təkyə kardedən və çəyku komək tələb kardedən.istionət həm çı ovni rişəku və həmonə mənoədəy. ım kəlmə bə vırədə oko doey beydə ki,inson coyli boçəy əncom doey ğadir ni və de qıləy co iborəti istionət çı tələbəkə(mustəinə)fərdi ocizəti iyən zəyfəti çı miyoniku bardey mənoədəy ki,de qıləy əməli  əncom doey məğsədiye ki,əy yali bə vırə rosneyədə ocize.bəçəy xotoye ki,muminə inson ıştə həmmə çi ısət çı hırd bıbu ya dıjd,fəğə və fəğət çı Xıdovəndiku tələb kardeydə.

Mustəani şərifə ism Kərimə-Ğıronədə dı kərə və fəğət çı Xıdovəndi həxədə oko doey bıə.Mustəan çı ğudrəti soybe.zira ikəs ki,dılış heste bə cokəsi koməkko,bəpe ğadir bıbu və əgər ım jıqo nıbu çəyku komək tələb kardey bə ağli əsos və məntıği ni iyən Kərimə-Ğıron həm de vey çokə vəchi əy Ərafi mıborəkə surə 197-ə şərifə ayədə bəyonış kardə və hamyedə:”vəlləzinə tədunə min dunihi....şımə ğərəz Xıdo vanq jıə kəson bəşmə istionət(komək)kardey  ğudrətışon ni.əvon bəştə həm komək kardey zuşon ni”.

Mustəani İlahi əsmaonku qıləyniye və çı Xıdovəndi bəştə bandəon bıə koməkiku hikoyət kardedə.həzrəte Yəğub(ə) çəy fərznd həzrəte Yusif(ə) qim bıə zəmonədə çı Xıdovəndiku istionət iyən koməkış tələb karde. bə Yusifi mıborəkə surə 18-ə şərifə yaə əsos,həzrəte Yəğub(ə) de Yusifi(ə) şəy vindey ki,çəy zoon əvışon bə dast dənoəşbe və çəy şəyışon xunin kardəşonbe,bəvon xitobən hamyeşe:”fəsəbrun cəmil....çən,mı səbr kardedəm ki,saxtiyonədə səbr ğəşənqe və çəvon votə çiyon barədə Xıdoku komək tələb kardedəm”. Peyğombəre-Əkrəmiku(s) omə qıləy rəvoyətədə nəğl bıə ki,ə həzrəti bəştə nezə səhobə bıə Əbuzər Ğəffori hamyeşe:”ha Əbuzər ha! qıləy tələb kardə zəmonədə ıştə tələb iyən hocəti fəğət Xıdoku tələbkə!. bərosti ki,Xıdovənd deştə ğəzavu-ğədəri ğələmi de tosə ğıyoməti ruji  jıqo tərsimış kardə və nıvıştəşe ehanə həmmə millət cəm bıbon və səykon ki,bətı qıləy nəf iyən foydə bırosnon,və lakin Xıdovənd ımış botı mığəddər kardəşni iyən nıvıştəş nibu,əvon ımi rosney nibəzıneyn.və əgər qırd millət cəhdkon ki,bətı qıləy zərəl iyən ziyon bırosnon və Xıdovəndo əvış mığərrə kardəşni iyən nıvıştəş nibu,əvon bətı hiç qıləy zərəl rosney nibəzıneyn”.....