Nəhcul-Bəlağə pand iyən hikməton-6

Nəhcul-Bəlağə pand iyən hikməton

Sadrul agil sunduğ....ağılmandi sinə çı sırron sondoxçəy və xoşədiməti dust pəydu kardey vəsiləy və təhəmmul iyən səbr kardey çı odəmi ayb iyən kamətiyon puşniyedə.

De milləti mıoşirət iyən təamul,çokə dust pəydu kardey və əy oqətey,həm ımrujnə modern iyən mıosirə dınyoədə və həmən harcurnə texnoloqiyə iyən elmi inkişofon nıbıə devronədə hejo insoni norohət kardə məsələonkuye.çəmə həkim iyən aliğədrə dədə həzrət İmom Əli(ə) Nəhcul-Bəlağə şəşminə hikmətdə çandə nuktə bo norohətçətiyon bərtərəf kardero boştə fərzəndon bəyon kardedə:joqo ki, hamyedə: ”sədrul ağil sunduğun....

İnsoni ğəlb iyən dıl de sırron pure və çəy kilid həm zıvoni qardışe.ziyodə zəmonədə qıləy zıəmon ki, bıpyimone bə ikəsi xotırcəməti bıdəmon ki,çəy sırron foş nibəkardemon.votedəmon:əy ıştə dılədə obəqətem.bə həmonə dəlili xoto bə dıli bənə çı “sırron sondoxçə” nomi noydən.çoko ki,sondoxçə qıləy əmnə vırəy ki,vey boho ğeymətinə çiyon əyo noydən ta hiçkəsi dast bəy nırəso.çı insonon sırr həm həmməysə vey erjin iyən ğeymətinə çiyonin ki,bəpe çı ikəsi ixtiyorədə ğərol nıqəto.

Fərdonku kali qıləyni çoko ki,de ikəsi dust beydən,ıştə sırron deəy bə miyon noydə.qıləy holədə ki,veyni dustətiyon kırtə umrışon heste və hətto mumkine ımrujnə duston maşkinə ruji de iyande deşmın həm bıbon.co tərəfiku veyə vaxtonədə de sırron bəyoni çı fərdon daxili zəyifətiyon oşko beydə və ın məsələ ıştən de dustəti rəğ-rişə zəyif iyən sıst kardedə.binobərin ağılmandə inson ehanə dılış bıbu çəy dustiyəti çı ehtıromi iyən səlomətəti pik həddədə bımando,həm ıştə sırron ıştə ğəlbi sodoxçədə muhafizə kardedə və həmən çı cokəson sırron foş nibəkarde.həyğətədə sır oqətey pəsəndidə sıfət min cumlə çə xosə sıfətonkuye ki,bəpe əy dust pəydu kardey koyədə nəzədə qətey bıbu.

Xoşədiməti həm çı sırr oqətey kəno coqlə vıronkuye ki,dust pəydu kardeyədə bəy təkid kardey beydə. çoko ki,zıneydəmon,dust pəydu kardey hoston ni.bəziyon dusti bə qıləy pərəndə təşbih kardedə ki,boçəy bə dast vardero bəpe səy kardey bıbu.Əmirəl-Muminin Əliyyibni Əbi Tolıbi(ə) kəlomədə həmməysə çok iyən kamə xarcış bıə vəsilə xoşədimətiye.xoşədiməti bənə qıləy rismoniye ki,şikori bəştə səmt okırneydə. bəşşoşəti iyən dimədə təbəssım insoni vey cəzbəkə iyən ğəşənəq kardedə.binobərin həmməysə çokə ro ıme ki,nevcıvonəti iyən cıvonəti devronədə çımi piyo təmrin iyn məşğ kardey lozıme ta bəçəy çoçinəti iyən heyrətamizəti xoto bəsə insoni dim iyən çehrə xəttonsə oşko beydə.

Əmirəl-Muminin Əliyyibni Əbi Tolıbi(ə):xoşədiməti xarcış nıbə qıləy ehsone.dustiyətiyədə coqlə muhimmə nuktə bə aybon tov vardey iyən təhəmmule ki,nəyinki,dust kardey pəydu kardeyədə qıləy əhəmiyyətış heste,bəlkəm çəy dəvomi zamin həm kardedə.bə həmonə dəlili xoto bəpe de təhəmmuli iyən hevujə ğəlbi ıştə dust iyən həmnişinon aybon piyo bəpe çəş vi kardey bıbu.çun hiçkəs məsum iyən çı ayb uyən noxsaniku bə diyəro ni,vey çoke ki,de hevujə ğəlbi və səbri ıştə duston aybonsə çəş vikəmon ta hiçkəs çəyku xəbədo nıbu.