Nəhcul-Bəlağə pand iyən hikməton-8

Nəhcul-Bəlağə pand iyən hikməton

Və ğalə(ə):iza ...çun dınyo bə ikəsi dimış qəte,cokəson çokətiyon bəy bə əmonət aspardedə və çun bəy peşt bıko,çəy çokətiyon dızdiyedə.

Əmirəl-Muminin İmom Əli(ə) Nəhcul-Bəlağədə bıə reçin iyən heyrətamizə koonku qıləyni çı dınyo təbyin iyən tevsife.dınyo dıqlə mısbət iyən mınfi və ya de co təbiri səmərənin iyən xərobəkə rolış bıey bəzıne.həm bə perosney iyən bərpoəti boyis bıey bəzne və həmən bə kuyəti iyən zəloləti səbəb bıey bəzıne.ehanə inson de bəsirəti çəşi bə dınyo nəzəko,bəy dərs iyən pand bədoe və dınyo çəy hərəbaxtəti vəsilə bəbe.əmmo həmonə dınyo co tərəfiku bə insoni ğəfləti səbəb bıey bəzıne və çəy həyğəti vində çəşi piyo qıləy pardə ğandey iyən bəçəy həlokət və məhfəti boyis bıey bəzıne.....

İlahi evliya və muminon dınyo bo bə axırəti rəseyro qıləy mıvəğğətə quzərqo və pard zıneydən və çı dınyo nemət və imkonatonku bo Xıdovəndi roziyəti kəsb kardey iyən bə pərvərdıqore-aləmi təğərrub və ruşdi mərhələon rəseyro oko doydə.əvon dınyoədə bıə xoş iyən noxoşə rujon və beçizəti iyən rifohinə rujon İlahi imtovon zıneydən və deştə səbr iyən təğvo ım imtovononku qıləyni bəsə coqləyni bədiqə dəvardedən ta bo bə xosə vəhışti əbədiyə baxtəvərəti rəseyro bəştə vucudi təkamuləti bıbaxşo.əmmo bo kali fərdon dınyo vəsilə iyən vositə ni.bəlkəm çəy qırd səy və fəoliyyəton məğsəd iyən hədəfe.çı dınyo zərğo-bərğ iyən cəh-cəlol çəvon çəşonış purış kardə və əvon bə dınyo ibrəton iyən çəşnaviyon dığğət kardedənin.çəvon çı fərdon vırə və məğami hukmi həxədə bıə meyor,əxloği fəziləton,imon iyən təğvo ni. bəlkəm çəvon çı dınyo nemətonku bərhrə bardey mizon və mığdorədəy.liza havaxti ikəs bə qıləy məğam iyən sərvəti soyb beydə,dınyo bəy ıştə eğvol iyən hərəbaxtəti sımış qətə və ehanə ikəs çın maddi avjoronku bebəhrə bımando,votedən ki,dınyo bəy peştış qordınə.....

İmom Əli(ə) nəvminə hikmətədə çəmə dığğəti bə dınyo bəvon dim qətə iyən peşt qordınə milləti holi əvəz bıey səmt cəlb kardedə və hamyedə:”iza əğbələtid-dunya....qıləy zəmon ki,dınyo bə ikəsi dimış qəte çı cokəson çokətiyon bəy bə əmonət aspardedə və qıləy zəmon ki,dınyo bə ikəsi peşt qordıneydə,ıştə çokətiyon həm çəyku seydə.

İmom Əli(ə) ın sıxanon ziyodə torıxi sənədonış heste.veyə fərdon ki,hukumət iyən siyosəti koonədə və ya iştimoyi iyən ixtisodi koonədə və ya hətto mıxtəlifə elmon iyən fənnonədə məşhur iyən məruf bıən. əmmo de zəmoni dəvardey iyən de təhğiğoton məlum beydə ki,çı cokəson ziyodə çokə koon çəvon pərvəndə və dosyeəonədə ğeyd beydə.Nəhcul-Bəlağə məşhurə şarih iyən şərhəkəyonku qıləyni İbn Əbil Hədid Mu`təzili çın hikməti şərhədə jıqo nıvışteydə:”ziyodə çokə şeronım vində ki,çun çəy votəkəs noməlum bıə çəyku inkor kardedəbin və bə şerədə məşhur bıə şəxson nisbət doydəbin.hətto ğeyri məşhurə şəxson elm iyən fənnonədə bıə kitobon mevcude ki,əy bə şehrəti soybon nisbət doydən”.

Bəle! camiyədə qıləy zəmon bə insoni erj noey meyor,pul və sərvət və reçinəti bıbu,hakəs ki,ziyodə maddi nemətonku bəhrə bıbu,vey mıvəffəğ bə nəzə rəseydə və çı cokəson nəzədə əziz beydə.jıqo kəson nəyinki,fəğət çı maddi nemətonku bəhrə bardedən,bəlkəm hətto millət həm əvoni səhfən çı əxloği kəmolaton soyb zıneydən.ğasbu bımi həmməysə vey çokə misol çı har camiyə miyono bıə selebriti ya məşhurə şəxson bıbon ki,dınyo bəçəvon dimi sırə zəmonədə hətto ehanə çəvon qıləy yavə staj və sabiğəşon həm bıbu və hiç qıləy kəmolatonışon həm nıbu,çəvon kanə sabiğ nəyinki,hiçkəs vindedəni, bəlkəm hətto çı cokəson çokə koon həm bəvon nisbət doydən və əvoni boştə əxloği iyən ideoloji ulqu ğərol doydən.jıqo qıləy camiyədə əgər ikəs qıləy mol və sərvəti soyb nıbu və çoko bəvoteyn dınyo bə peşt bıqordıno,millət həm əy zəlil zıneydən və həmməysə yavə çi ıme ki,çəy əxloği iyən elmi kəmolaton həm vindedənin və hətto mumkine ki,ehanə və çı qıləy hınə və elmi soyb həm bıbu,həmonə əsəri bə məşhur və mol iyən sərvəti malik bıə şəxson nisbət doydən.