Nəhcul-Bəlağə pand iyən hikməton-9

Nəhcul-Bəlağə pand iyən hikməton

Xalitun-nasə.muxalətən....de milləti jıqo jimonkənən ki,ehanə millət mardiyon əvon boşımə bıbəmon və əgər bəyji mandiyon,de səmimi ğəlbi deşmə mıoşirət kardey tələbkon.

İnsoni fitri xıslətonku qıləyni ıştəni piye məsələy və ya de qıləy co iborəti ıştəni pieye.ım fitri xıslət çəy ziyodə rəftori mərkəze.hətto bə Xıdo meyl iyən bə Xıdo məhəbbət həm çın meyli dılədə noey bıə.çıro ki, har qıləy insoni dılış heste ki,bə kəmol iyən hərəbaxtəti həmməysə barz iyən çokə dərəcəon dast pəydukon.qıləy səodət ki,nəyinki,çəy dınyo,bəlkəm çəy əbədiyə jimoni axırətədə həm təzmin kardedə.

Qıləy inson ki,ıştənış piyedə,bə cokəson nəzə həm əhəmiyyət doydə.ısət millət çəy barədə çokonə ğəzovət iyən mıhokimə bəkarde,boəy muhim ni.İslomə mığəddəsə ayin həm bə camaati nəzə və vindemoni əhəmiyyət doydə.çoko ki,çandə qılə rəvoyətonədə omə ki,ehanə qıləy fərd bımardo və çı millətiku çıl qılə imoninə şəxson çəy cənozə piyo hozzı bıbon və bıvoton:”Allahummə inna...Xıdolim ha! çəyku ğərəz çoki co hiççi zıneydənimon və tı çəy holi bəsə əməsə vey çok zıneydəş.Xıdovənd həm bə həmonə cəonzə de rəhməti çəşi nəzə kardeydə və hamyedə:mı şımə şoydəti ğəbul kardedəm və ə qıno ki,az zıneydəm və şımə zıneydəniyon,baxşıme.həmçinin Xıdo-Rəsuliku(s) omə rəsə qıləy hədisədə nəğl bıə ki,ə həzrəti hamyəşe:”çı munini maqi bədiqə çəy nomədə nıvıştə bıə iminə çi ki,milləti çəy həxədə votə çiyonin.ehanə çoki bıvoton,çoki bənıvşteyn və əgər bəd bıvoton,bəd və bevəc bənınışteyn......

Bo milləti roziyəti cəlb kardero həmməysə çokə metod çokə mıoşirət iyən rəftore.joqo ki,ımko həm çəmə jimoni zəmonədə və həmən çəmə maqi bədiqə bəmə nisbətədə qıləy çokə nəzə və zənni icod kardedə.həzrət Əmirəl-Muminin İmom Əli(ə) Nəhcul-Bəlağə daminə hikmətədə bə ın məsələ işorə kardedə və hamyedə:” Xalitun-nasə.muxalətən....de milləti jıqo jimonkənən ki,ehanə millət mardiyon əvon boşımə bıbəmon və əgər bəyji mandiyon,de səmimi ğəlbi deşmə mıoşirət kardey tələbkon....

Çın fəziləti komilə nımunə İslomi azizə peyğombəri(s) mığəddəsə zote ki,həm çə həzrəti həyot və həmən çəy rehləti bəpeştə bo dınyo bəşəriyyəti həmməysəm mahbubə çehrə və simo bə hisob omeydə.

Xıdo yolə peyğombər(s) jıqo mahbub be ki,vuz və dastnımoj qətə zəmonədə bo ə həzrəti vuzu oviku ziyodə peqəteyro mısılmınon de iyande rəğobət bardedəbin.Hudeybiyyə sulhi macəradə Məkkə Ğureyşi yolon Ğərvə ibn Məsudışon bənə ıştə məxsusə nımoyəndə unvoni bə həzrəte Rəsuli-Əkrəmi(s) huzur vığandeşone ki,çəvon tərəfiku sulhi mığovilə imzoko.əv çı səhobə bə peyğombəri(s) bıə nığılə irodət iyən məhəbbətış vinde və bo Ğureyşi yolon jıqo məlumotış doe:mı yolə şahonım vində.bənə Kəsra,Rumi ğeysəri və Həbəşə sultoni bıə yolə ğudrətonım mışohidəm kardə və çəvon hiç qıləyni mahbubiyyət və mevğıyyət bənə Muhəmmədi(s) mahbubiyyətim nıvinde.az deştə çəşon vindeme ki,çokonə çəy səhobəon nıhaşteşone ki,hətto i ğətrə ov həm çəy dastnımojiku bəsə zəminisə rubo və əvon əy bo təbərrıkiro iyande miyono təğsım kardeşone.əvon hiçvaxti hozzı nin çəyku dast bıkəşon.binobərin Ğureyşi yolon bın məsələdə bəpe fik-famk və təfəkkurkon.az çımiku tarseydəm ki,şımə deəy mıborizədə bə məğlubiyyət iyən zılləti dıço bıbon.ım çı İslomi peyğombəri(s) ıştən jimoni zəmonədə bıə mahbubiyyətiku qıləy nımunə be.....

Həzrəte Rəsuli-Əkrəmi(s) rehləti bəpeştə həm rujbəruj bəçəy məhəbbəti əlovə bıə tayinki,ısət həm deməkə ki,İslomi deşmınon ziyodə təblığoton bardedən,əmmo çandə milyard nısılmınon bə həzrəti qıləy eşğ və məhəbbətışon heste və bəçəy risolətti şoydəti doydən.çı milləti ın məhəbbət və irodət nəyinki, fəğət bə Xıdo-Rəsuli(s) məhdud beydəni,bəlkəm hakəsi de cokəson qıləy çokə rəftorışon bıbu və qıləy çok iyən sadiğonə mıoşirətışon bıbu,mahbub bəbe......