Nəhcul-Bəlağə pand iyən hikməton-10

Nəhcul-Bəlağə pand iyən hikməton

Və ğalə(ə) :”iza ğədərtə əla əduvvik...havaxti bəştə deşmıni ğalib omiş,çəy qınonku dəvardey və əy əfv kardey,bəy ğələbə pəydu kardey şukri ğərol bıdə”.

Ziyodə vaxtonədə çı Xıdovəndi neməton həxədə sıxan votə zəmonədə mumkine həmonə nemət zehnədə qıləy çi məhsub bıbu ki,bə insoni dasti rəseydə.bənə qıləy hədiyyə ki,ıştə dustiku ğəbul kardedə.qıləy holədə ki,İlahi neməton həmmə məhsus iyən hiss beydəni və de sə çəşi vindey beydəni.məsələn aya qıləy məhəbbət ki,Xıdo əy bə dılon şodoydə və qıləy şəxsi mahbub kardedə,ım çı Rəhmonə Xıdo tərəfiku qıləy nemət bıey əzıni?aya qıləy zəmon ki,şoyvonəti çı ğəmi vırədə bə dıl nışteydə,qıləy dıjdə nemət ni?....

Co tərəfiku əmə həmmə çok-çoki zıneydəmon ki,bo har qıləy neməti qıləy şukr lozıme ki,ehanə bə əməl boy,bə neməti baği mandey və bəçəy ziyod bıey boyis beydə və əgər ım əncom doey nıbu,çə həmonə neməti kam bıey və çı miyoniku şıey ehtımol ziyode.həzrət İmom Əli(ə) Nəhcul-Bəlağə yonzəminə hikmətədə qıləy dıjdə neməti bəçəmə yod dənoydə ki,ehanə ım təzəkkur iyən bəyod dənoey bıənəbe, ğasbu çəməku ziyodə şəxson əy çı neməti nımunə zıneydənimon və nəticədə çəy şukri bə vırə rosneydənimon.

Əmirəl-Muminin həzrət Əli(ə) bın hikmətədə jıqo hamyedə:”iza ğədərtəəla əduvvik...havaxti bəştə deşmıni ğalib omiş,çəy qınonku dəvardey və əy əfv kardey,bəy ğələbə pəydu kardey şukri ğərol bıdə”.

Yəni ehanə ikəs bəmə zılmko və i mıddəti bəpeştə giriftor be və əmə bə ğanuni əsos deəy mıborizə bardey bəzınemon və əy bəçəy ıştən cəzo rosney bəzınemon.ım çəmə həxonış poymol və zayış kardə bə qıləy zolımi dast pəydu kardey iyən sultə,ıştən qıləy neməte.qıləy dıjdə nemət ki,bəpe çəy şukri bə vırə rosney bıbu.de jıqo qıləy neməti mıtənosibə şukr əfv iyən baxşeşe.çoko ki,elmi şukr bə cokəson omutey,sərvəti şukr bə ehtiyocinə fərdon komək kardey və ğudrəti şukr,bə de zolımon mıborizə bardə kəson iyən məzlumon komək kardeye.

Bə Xıdo-Rəsul(s) iyən Əhli-Beyti(ə) jimoni qıləy nəzə kardeyədə,əmə çə həzrəton jimonədə ın mevzu ziyodə cilvəon mışohidə kardedəmon.Məkkə fəthi cərəyonədə qıləy zəmon ki,həzrəte Muhəmməd(s) bəy çandə dırozə soron mıddətədə əzob-əziyyət kardə kəson,çə həzrəti səhobəon iyən nezə odəmonış kıştə deşmınonsə səbarz be,jıqo hamyeşe:ımruj çı baxşeş iyən əfvi ruje.

İyo dığğət kardəninə nuktə ıme ki,intiğomi bə quzəşt təbdil kardey,iştimoiyyətədə barz və səmərəninə təsirış heste.ehanə çı har qıləy zılmi əvəz beşey bıbu və har ğətli dumo co qıləy ğətl bə əməl boy,ğəzəb iyən kin-kudurət qırd camiyə dəbəqəte.qıləy holədə ki,əfv iyən quzəşt deşmınəti,ədovət iyən bədxahəti çı miyoniku bəbarde və bə camiyədə oroməti və lətofəti icodəti səbəb bəbe.binobərin əfv iyən baxşeş çı əxloği fəzilətisə əlovə,inev iştimoyi tədbir həm bə hisob omeydə.

Həlbəttə ın muhimmə nuktə həm zikr kardey lozıme ki,ım istisnoyi əmr vey muhimme və əv həm çımiku iborəte ki,qıləy vırədə ki,deşmın baxşeş iyən quzəşti çı zəyfəti nışonə bızıno və ya bəçəy sənibəton cəsorət pəydu kardey boyis bıbu və əv bəştə xusumət iyən deşmınətiyon dəvom bıdo,həni iyo baxşeş səhih və dırıst ni.əmmo ğudrəti soyb bıə zəmonədə baxşeşi dı qılə səviyyədə təsirış heste.bə baxşə kəsi dıli səfo baxşeydə və bə zolımi həm imkon doydə ta əv ıştəni islohko.