Nəhcul-Bəlağə pand iyən hikməton-11

Nəhcul-Bəlağə pand iyən hikməton

İmom Əli(ə) hamyedə:Əcəzunnas.....milləti həmməysə ocizə fərd əkəse ki,dust pəydu kardeyədə ociz bıbu və çəysə həm vey ociz,əkəse ki,bəştə dast vardə dusti çı dasto bıdo.

Jimonədə muhimmə məsələonku qıləyni de cokəson dustiyəti rabitəon bərğərol kardeye.hırdənon bə zəmini ğədəm noə sıftənə rujonku ki,dəvardedə,de cokəson dustiyəti həm bənə jimoniku bıə qıləy baxşi və hissə bino beydə.duston çəmə jimoni muhimmə əczonku qıləyni bə hisob omeydə.əvon bəmə qıləy nezəti iyən məhəbbəti hissi doydə və bəçəmə ləzzət iyən şoyvonəti boyis beydə və bəmə komək kardedə.əvon əməni de hissiyot və atifə himoyə kardedən və çəmə ehtiyoc bıə zəmonədə bəmə ro nışon doydən.odəmi dığğəti cəlbəkə çi ıme ki,bızınəmon çandə oxonə soron təhğığoton nəticə nışonış doə ki, çokə dustonış bıə fərdon həm psixoloji cəhəto vey solimin və həmən əvon dırozə umr kardedən...

Qıləy dusti təsir mumkine çı hol və ısətnə zəmonisə bə kəno bıbu.yəni çəmə duston ayəndə və omə rujonədə bəmə qıləy təsironış bıbu.ım təsir noey dı nuktə cəhəto dığğət kardənine.iminə qıləyni ıme ki, ım təsir noey dırozə mıddətədə bə əməl boy.liza qıləy çokə dust dırozə mıddətədə bəştə dusti təsir noydə və bədə dust həm insoni qədə-qədə çı rostə royku inhirof kardedə tayinki,əy umumən bə cəhəndımi səmt bardedə.çoko ki,Furğani mıborəkə surə 28-ə şərifə ayədə qıləy zəmon ki,qıləy fosiğə fərdi çı cəhəndımi palu bıbon,de qıləy həsrəti bəvote:”Ya vəyləta....vay bıbu bəmı kaş az fulon fosidə şəxsım boştə dustım qətəm nıbe.....

Qıləy çokə dust bo qıləy insoni sərmoyə bə hisob omeydə.qıləy sərmoyə ki,nəyinki,bo bə insoni muşkiloton zəmonədə komək kardeye,bəlkəm bo uns qətey və çəvon təcrubə iyən nəzəonku bəhrə bardeyro,zəruriye.İmom Əli(ə) “Ğurərul-Hikəm və Durərul-Kəlim” şərifə kitobədə hamyedə:”mən la sədiğə ləh zuxrə ləh:ikəs ki,dustış ni,qıləy zəxirə iyən ehtiyotış ni”.

Şək ni ki,jimonədə çı insoni sərmoyəonku qıləyni çok iyən səmimi duste.çoko ki,zıneydon ım sərmoyə kəsb kardey insoniyə koye və bə moli bə dast vardey əks ki,bə ziyodə səy və cəhdon ehtiyociş heste və ya bənə qıləy məğami ki,əy bə dast vardero bə qıləy zumandə iştimoyi rabitəon ehtiyocış heste,qıləy hostonə ko ni.bəlkəm de xoşə diməti,ədəbi iyən mıoşirəti hissi de rohətə formə  əy bə dast vardey bəbe. boçımi əsos İmom Əli(ə) Nəhcul-Bəlağə donzəminə hikmətədə jıqo hamyedə:”həmməysə vey ocizə inson əve ki,dusti bə dast vardeyku ociz bıbu”.peşo İmom(ə) izofə və əlovə kardedə ki,çəysə həm vey ocizə fərd əve ki,bə dast vardə ıştə çokə dusti deştə bədə əxloği iyən bəçəy həxon rioyət nıkardə holədə əy çı dasto bıdo”.

Boçi ki,ziyodə zəmononədə qıləy çi bə dast vardero i mığdor zəhmət tələb kardedə,əmmo əy oqətey vey hostone.binobərin ikəs ki,ıştə dusti de qıləy be etonəti iyən be mehribonəti çı dasto bıdo,çı dust bə dast nıvardə kəsisə vey ociz və zəyife......