Nəhcul-Bəlağə pand iyən hikməton-15

Nəhcul-Bəlağə pand iyən hikməton

Həzrət Əli(ə) hamyedə:filləzinə....(və çı canqiku bə kəno mandə kəson barədə hamyeşe:)həx xar kardeşone və bə botıli komək nıkardeşone.

Cəməli canq de dınyotələbəti,kələk,beməxəti,zırənqəti iyən deştə şəytoniyə planon məcmuə,qıləy dıjdə fitnə be ki,bo iminə kərə mısılmınonış çı iyande mığobilədə ğərolış doe.çımi bənav ehanə mısılmınon qıləy cəbhədə ğərol qəteydəbin,hukmən və hətmən çəvon mığobilədə kofir iyən mıştikon bin.əmmo ın dəfə dıqlə ləşkər iyande mığobilədə mandin ki,har dıqlə tərəf həxpərəstəti iddio kardedəbin.həlbəttə Peyğombəre-Əkrəm(s) çandə soron ıştə bəfoti bənav çın canqi bə əməl omeyış de “Nakisin” yəni ıştə əhdi darıştəkəson təbiri bə Əmirəl-Muminin həzrət Əli(ə) təkidış kardəbe.

Millət bo de fitnə əkəyon iyən umumi əmniyyəti bəyənde jıə kəson canq kardero hozzı beydəbin. ə çəpavuləkəyon ki,mıxtəlifə şəhronədə məxsusən Bəsrə şəhrədə de milləti ğətli-am iyən deçəvon molon ğarət kardey koy məşğul bin.bın miyono Yolə şəxsiyyətonku ço nəfər ıştənışon bə kəno kəşe və de sayir mısılmınon bə ico ıştə niqəronətişon izhor karde.ım ço nəfər əbdullah ibn umər,muhəmməd musləmə, usamə bin zeyd) ıştə duşon çı qıləy şubhə peştono niyon kardeşone və voteşone ki,əmə çın canqi həxətiyədə şəkkımon heste və tarseydəmon ki,çəmə daston bə mısılmınon xunon aludə bəbe.həzrət Əli(ə) bın səhnədə deştə mislış nıbə tədbiri bəvon hamyeşe:şımə bışənən bəştə kəon və bə umum məxloği çəş məçiyənən ki,məbodə şımə ıştə şubhəon bəvon həm oməvoştənən.peşo çoko ki,yonzəminə hikmətədə bəyon be,çın ço nəfəri bə diyəro bıey bədiqə jıqo hamyeşe:ma kullu ...bə qıləy fıtnə dıço bıə hakəsi mızəmmət kardey erjış ni”......

Bın holədə ki,ləşkər bo hərəkət kardero hozzı beydəbe,Haris ibn Həovt nomo qıləy fərd de ın ço nəfəri rəftori vositə bə şəkko-şubhə dıço be.bənə təlhə iyən zubeyri bıə kəson sabiğə və dəvardəy ki,çın fıtnə və çı Cəməli canqi bərpo kardə əsliyə fərdon bin,bo Haris ibn Həovti ki,bənə qıləy ğoymə səddi çı harcurnə fik iyən əndişə royədə mandedəbe,jıqo çəvon əğedəvi inhirofonış nıvinde,bəlkəm hətto çəvon beytul-moli səhmi peqəteydə bıə vazeh iyən oşkoə ziyodə tələbəti və isrofçəti,ıştə beyəti darıştey və mısılmınon ğətlı-am kardey həm vindedənıbe.bə həmonə dəlili xoto,bə Əmirəl-Muminin həzrət Əli(ə) ərzış karde:az həm bənə ın ço nəfəri bın canqədə iştirok kardedənim.

İmom Əli(ə) ki,zıneydəbe millətiku ziyodə odəmon byənde qıniyə iyən mırəkkəbə fıtnə zəmonədə həxı çı botıliku co kardey və çəvon miyono farğ noey ğudrətışon ni.çımisə əlovə farğ noey iyıən təhlili ğudrət bıə holədə həm,bə məlumoton dast nərəsey və ya çı hodiəson cuziyyot və detalonku kifoyət ğədərədə xəbədo nıey,əvon qıləy dırıst iyən səhihə təhlil kardey nibəzıneyn,əve bo ın mevzu ruşin və oşko kardey xoto,bə Harisi hamyeşe:Haris ha! tı bə hodisəon de qıləy kırtə nəzə diyə karde,nəyinki,de nığıl və zırənqə formə.bəçəy xoto jıqo sərqədon mandəş.tı nə həxı zınə ta bızınoş kom kəs həxı əhle və nə botılı zınə ta bızınoş çəy tərəfdoron kom kəsonin.qıləy fıtnədə ki,itərəf həxe və coqləyni tərəf botıl,hətto sukut kardey iyən əyo iştirok kardey həm inev de deşmıni bə ico bıey iyən de həxı mıborizə bardeye.bəle əve əvon həx xar kardeşone iyən bə botıli komək nıkardeşone