Nəhcul-Bəlağə pand iyən hikməton-20

Nəhcul-Bəlağə pand iyən hikməton

Və ğalə(ə):yəbnə Adəm,iza.....ha Odəmi fərzənd ha!havaxti vinde ki,Xıdovənd ıştə neməton dumo yənde botı vığandedə,qıləy holədə ki,tı deçəy əmron mıxolifəti koy məşğuliş,çəyku bərhəzərkə(niqəron bıbu məbodə qıləy sanqinə cəzo ıştı intizorədə bıbu).

Qahi zəmon kali qınokoron ki,ıştən ıştə hisobış nıbə qınoonku vağif və aqah nin,təsəvvır kardedən ki, harçənd əvon bə çandə qılə ziyodə qıno iyən xətoon mırtəkib beydən,əmmo Xıdovəndi ijən əvonış piyedə və çəvon məsiyəton nəzədə qəteydəni.hətto bəzi vıronədə jıqo bızın çandə vey bə qınon mırtəkib beydən,veyə neməton həm ğəbul kardedən.de qıləy co iborəti nəyinki,Xıdovənd bəvon cəzo doydəni, bəlkəm çəvon sərvət,şehrət iyə məğami həm ziyod kardedə.

Əmirəl-Muminin Həzrət Əli(ə) Nəhcul-Bəlağə vistı pencminə hikmətədə bə məğrurə qınokor iyən ğafilon ki,bə ziyodə qınon mırtəkib beydən və çəvon sərvət iyən ğudrəton həm ziyod beydə,xəbədoəti və çəşnavi doydə və hamyedə:”və ğalə(ə):yəbnə Adəm,iza.....ha Odəmi fərzənd ha!havaxti vinde ki, Xıdovənd ıştə neməton dumo yənde botı vığandedə,qıləy holədə ki,tı deçəy əmron mıxolifəti koy məşğuliş,çəyku bərhəzərkə(niqəron bıbu məbodə qıləy sanqinə cəzo ıştı intizorədə bıbu)......

Qınokoron dərəcon tafutine.kali qıləyni de bə qınon mırtəkib bıeylıski bədiqə,ıştən dərəseydən və rəyrə tobə kardedə iyən oqardedə.coqlə dastə tikəy sanqinə qınoşon heste.Xıdovənd  çəvon qınon mığobilədə bəvon quşmali doydə və ım ko bəçəvon oğoəti iyən tobə kardey səbəb beydə və ın çı Xıdovəndi çəvon həxədə bıə lutfe.

Əmmo dastə həm hestin ki,bə tuğyonqərəti barzə həddi rəsən və Xıdovənd bəvon cəzo doeyro,çəvon əncom doə qınon mığobilədə,bəvon nemət baxşeydə.əvon jıqo təsəvvır kardedən ki,ım İlahi lutfe ki,bəçəvon ləyoğəti xoto bəçəvon holon şomil beydə.

Şərifə Kafi kitobədə İmom Sadığiku(ə)jıqo nəğl bıə:”Xıdovənd qıləy zəmon ıştə bandə çokiş bıpyo,əv qıno kardə zəmonədə bəy quşmoli doydə ta bə tobə yod dəşo və qıləy zəmon ıştə bandə bevəciş bıpyo,əv qıno əncom doə zəmonədə bəy qıləy nemət bəbaxşe ta əv istiğfori çı viro beko və bəştə ko dəvom bıdo və ım həmonə çiye ki,Xıdovənde-Mutəol hamyedə:”sənəstədricihim ....əmə bəvon de tədrici əvoni çəvon  nızınə vırəku bə cəzo giriftor bəkardemon de neməti çı qıno zəmon bıə baxşeşi”.(Ərafi mıborəkə surə 182-ə şərifə ayə).

İyo ım sıvol bəna beşeydə ki,çı Xıdovəndi ko bəşəri hidoyət iyən əy oğo kardeye,nəyinki,ğafil kardey və əy bə bəlo giriftor kardey.çın sıvoli cəvobədə bəpe bə ın nuktə dığğət kardey bıbu ki,İlahi lutf,tovfiğ iyən ovadətiyon bə ləyoğəton əsose.qahi zəmon fərdon jıqo məstı-xumor səşon tasb bıə və deştə tuğyonqərəti məşğulin ki,ıştə harcurnə hidoyəti ləyoğəti çı dasto doydən və həyğətədə ım çəvon əməlonon ki,əvonış çı Xıdovəndiku bə diyəro kardəşe və əvon hətto çı çəşnavi ləyoğətışon həm ni, bəlkəm çımi əks,çəvon bo qon iyən sanqinə cəzo və əzobon ləyoğətışon heste.