Nəhcul-Bəlağə pand iyən hikməton-24

Nəhcul-Bəlağə pand iyən hikməton

Və ğalə(ə):Əlhəzərə....əlhəzər!çəşnavi!bə Xıdo ğəssəm,jıqo pardəş puşniyə ki,tı fiki karde tınış baxşəşe...

Pərvərdıqore-Aləmi sıfətonku qıləyni,Səttarəl-Uyube ki,həmonə de Xıdovəndi təvəssuti aybon puşniye, dıqlə foydəş heste.əvvəl ıme ki,çı fərdon şəxsiyyət iyən ehtırom hifz və oqətey bıbu.bə fərdon şəxsiyyət doey,bə qıno suğut iyən tənəzzuli maneyəonku qıləyniye.çıro ki,ehanə camiyədə şəxsiyyət de qıno iyən yavə əməlon məşhur bıbu,həni bo qıno kardeyro qıləy tarsış nibəbe və fərd ıştəni tiki həm ziyod bə qıno aludə bəkarde.əmmo çoko ki,dərəse çəy qınoşon oşko kardəşon ni və puşniyəşone,həyo kardedə və bəy ijən sənibəton irtikobiku pərhiz kardedə və bə diyəro mandedə.

Dıminə foydə ıme ki,ozodəti iyən ixtiyori əsl de səttoriyyəti vıə puşniyey oqətey beydə.de qıləy co iborəti əgər ikəs de qıləy qıno bə vırə rosney rısvo bıəbe,həni dast xəcoləti coqlə qınon əncom nıədəy və ım qıno nıkardey bə İslomi ayin iyən əxloği usulon rioyət kardeyro nıəbi,bəlkəm bə rısvoyçəti tarsi xoto əbi və çımi hiç qıləy erj iyən ğıymətış nıəbi.

Xıdovənd deştə hevujə rəhməti  ıştə bandəon punhoniyə qınon ifşo kardedəni ta çəvon abru oqətə holədə,əvoni çı ğəfləti haniku oğo kardedə ta çəy bandəon bəçəy səmt oqardon və tobəkon.Əmirəl-Muminin Həzrət Əli(ə) Nəhcul-Bəlağə 30-ə hikmətədə bə həmmə məsiyət iyən qıno kardə kəson çəşnavi doydə ki,İlahi səbriku ıştə mə`siyəton mığobilədə məğrur nıbon.ə həzrət hamyedə:”Əlhəzərə..... əlhəzər! çəşnavi!bə Xıdo ğəssəm,jıqo pardəş puşniyə ki,tı fiki karde tınış baxşəşe.....

İmom Əli(ə) bın həkimonə sıxanədə xəbədoəti doydə ki,de İlahi ın lutf iyən inoyəti məğrur məbəbən. məxsusən ki,mumkine ım çı İlahi neməton baxş kardey ğanun və adət bıə istidraci adət bıbu.istidrac bə İlahi əzobi tədrici surətədə nez bıey mənoədəy.istidrac bo ə qınokorone ki,bə Xıdo neməton xoto şukr kardedənin iyən çandə zuşon vışkiyedən,qıno kardedən və çımon mığobilədə ijən bəvon veyə neməton doey beydə ta de ın tərıği çəvon ğurur iyən ğəflət ziyod bıbu və nəticədə bə vey dardnokə əzobon giriftor bıbon.həlbəttə bə veyə neməton soyb bıey ıştən-boştə istidraci nışon doydəni.bəlkəm çı insoni çəvon mığobilədə bıə əksul-əməl iyən reaksiyə təyin kardedə ki,əv bə istidraci dıço bıə ya xeyr.de qıləy co iborəti ehanə qıləy odəm çı Xıdovəndi neməton mığobilədə şık kardey əvəzi,bə kufri səmt bışo,bəştə nopəsəndə hərəkəton dəvom bıdo və ijən çəy neməton ziyod bıbu,əv bə istidraci giriftor və dıço bıə.boçi ki,Xıdovənd əy bə əfv iyən baxşeşi loyığ vindedəni və bəçəy ıştən holi vododydə ta çəy peşt de qıno bo sanqin bıbu,çən peşo de şiddəti əy bəçəy cəzo bırosno.

Əmirəl-Muminin Həzrət Əli(ə) ın həkimonə sıxanədə boəmə qıləy dərs bıey bəzıne ki,əmə həm çı cokəson aybon bıpuşnəmon və çoko ki,əmə çı ikəsi məxfiyə qınonku xəbədo bimon,rəyrə əy ifşo məkəmon,çəy abru məbəmon və bəy ıştəni isloh iyən tobə kardey məcol və fırsəti bıdəmon və de ın roy vositə ıştəni de İlahi sıfəton dərsotəmon və bə Xıdovəndi Səttarəl-Uyubi yəni bə pardə puşniye sıfəti nezkəmon.....