İmom Huseyni(ə) noməlumə duston-1

İmom Huseyni(ə) noməlumə duston-1

Hiç qıləy hərəkot bəfodorə duston nıbə holədə conış qətəni və hiç qıləy ğıyom  fədokorə duston nıbə holədə bə sərəncom rəsəni.beşək çı qıləy təsirinə ğıyomi rəhbər ya rəhbəron muhim iyən təsirinə rolonsə əlovə ki,bə qıləy nığılə hodisəon icod kardey xoto torıxi dırozi əbədi mandedə, çın curnə hərəkət və ğıyomon əbədi mandey bə fədokor iyən bəfodorə duston və yaro-yavəron ğarzıxoye ki,əvon bın ğıyomonədə iştirokışon kardə və ıştə rəhbəronışon coyli haştəşon ni.torıxi dırozi dıjd iyən təsirinə ğıyomonku qıləyni Aşurə ğıyome ki,həzrəte İmom Huseyni(ə) bəfodorə duston bın dıjdə ğıyomədə muhim iyən dıjdə rolışon ifo kardə.çı şiəyon seminə imom həzrəte İmom Huseyni(ə) ıştə bəfodorə əshobon jıqo tevsif kardedə:”az ıştə əshobonsə vey bəfodor iyən vey çokə co hiç qıləy əshobım nıvinde”.

Həzrəte Seyyiduş-Şuhəda(ə) bəfodorə duston miyono kali qıləyniyon de nıvıştəyon iyən de minbəron təvəssuti vey zıney və məşhur bıən.əmmo bə bəzi qıləyniyon jəqo həm işorə kardey bıəni və bə həmonə cəhəti xoto ımruj əmə bə həzrəte İmom Huseyni(ə) kam zıniyə bıə bəfodorə əshobon işorə bəkardemon və çəvon jimon iyən çokonə bə şəhodəti məğami rəsey həxədə şərh bədomon.lutfən.....

Həzrəte İmom Huseyni(ə) bəfodorə duston xısləton barədə ki,əvon torıxədə əbədi mandən,sıxan voteyədə bəpe bəçəvon seqlə əsliyə xısləton yəni bə səbr,ixlos iyən bəfodorəti işorəkəmon. əkəson ki,Aşurə ğıyomədə həmmə de Həzrəte Seyyiduş-Şuhəda(ə) bə ico vey yavə və vey saxtə şərayitonədə iştirokışon kardə,hiçvaxti maqiku tarsışon bıəni,oqıniyənin və de həmonə istiğomət və mığoviməti bə şəhodəti məğami rəsin ta vəhışti boştə mıkofot bıhıron və çı İnsoni surə donzəminə şərifə ayə nımunə bıbon ki,hamyedə:”və cəzahum.....və bəvon bo(dini təklifon iyən rujıqori hodisəon mığobilədə)səbr kardey xoto,qıləy vəhışt iyən avşımiku bıə oləton mıkofot doydə”.....

Muslim ibn Kəsir Əzdi çı həzrəte İmom Huseyni(ə) bəfodorə dustonku qıləyni be ki,Aşurə ğıyomədə qıləy dıjd və təsirinə rolış ifo karde.əmmo əmə çəy həxədə nıvıştəyon iyən votəyonədə kam handəmone və kam məsəmone.çəy dədə Kəsir ibn Ğəlib Sədəfi qıləy fəzilətin,ğıronşınos iyən Yəməni ğəbiləku bıə ravi be ki,çı Xıdo-Rəsuli(s) səhobəonku bə hisob omeydəbe.

Muslim çı İmom Huseyni(ə) buzurquvorə pı və çı şiyəon iminə imom və rəhbər bıə həzrət Əli(ə) canqon cərəyonədə de Nakisin və ıştə əhdi darıştə kəson canq bıə Cəməli canqədə iştirokış kardə.əv 47 sornə merd be ki,bın canqədə de şucoəti mıborizəş barde və çı Nakisini cəbhə bıə de əmr ibn ziğə təmimi tiy vositə çı po və lınqiku zəxmin be və bəçəy xoto hejo lanqedəbe.çın vağiyə bədiqə əv de Ə`rəc yəni lanqə kəsi nomi məşhur be.əv qıləy mıborizə mısılmon be ki,çı İmom Huseyni(ə) bə Kufə bıə dəvəti zəmonədə qıləy barzə rolış ifo karde və de ziyodə səyon camaati bə de İmom Huseyni(ə) bə ico bıey səmt təşviğ kardedəbe.çı Suleymon ibn Surəde Xuzayi kə Kufədə bə mıborizə mrəkəzi oqardə zəmonədə,əv həm bə Əba Əbdullah İmom Huseyni(ə) nomə nışvıştə kəsonku be və ə həzrətış bə Kufə şəhri dəvətış karde.Muslim ibn Əğili ğıyomi zəmonədə ki,ziyodə insonon bəy beyətışon karde,əv həm bə Muslimi bəfodor mandə şəxsonku be.

Çəy bədiqə deməkə ki,əv qıləy piyə merd və lınqış həm lanqedəbe,səyış karde ıştəni bə Əba Əbdullah İmom Huseyni(ə) bırosno tayinki,çı Kərbəlo neziyədə bə İmom Huseyni(ə) kərvoni rəse və de ə həzrəti bə ico həmsəfə be.

Kərbəlo vağiyə zəmonədə çəy təğribən hafto sinnış hestebe,əmmo nə çəy sinni barzəti iyən nə çəy lanqəti,bəçəy Aşurə ğıyomi zəmonədə bıə şucoət iyən bəfodorəti mane bıey nızıne.əv de bə İmom Huseyni(ə) bıə eşği deştə qırd zu və ğıvvə mıborizə kardedəbe və Aşurə ruji sıbi vaxti və çı yəzidi ləşkəri bə Həzrəte Seyyiduş-Şuhəda(ə) ləşkəri səmt tiybarani zəmonədə bə şəhodəti məğami noyil be.çı Muslim ibn Kəsiri nom bə İmom Huseyni(ə) məxsus bıə Nahiyee-Mığəddəsə ziyorətədə omə və əyo bəy səlom doey bıə.