Эрон ташқи ишлар вазири: Эрон тенг мавқедан адолатли ядровий музокараларга тайёр

Эрон Ислом Республикаси ташқи ишлар вазири мамлакатнинг ядровий дастури тинч мақсадларга йўналтирилганини таъкидлаб, Эрон тенг мавқе, ўзаро манфаатлар ва ўзаро ҳурмат асосида ўтказиладиган шароитда ядровий музокараларни қайта бошлашга тайёр эканини маълум қилди.

Эрон ташқи ишлар вазири Саййид Аббос Ироқчий жума куни Истанбул шаҳрида Туркия ташқи ишлар вазири Ҳакан Фидан билан ўтказилган қўшма матбуот анжуманида сўзга чиқиб, Эрон Ислом Республикаси ҳеч қачон ядровий қурол ишлаб чиқаришни кўзламаганини ва бундай қуроллар мамлакат хавфсизлик доктринасидан жой олмаганини таъкидлади. Унинг айтишича, Эрон ядровий дастурининг тинч хусусиятига нисбатан ишончни мустаҳкамлашга доим тайёр бўлиб келган ва агар музокаралар жараёни адолатли ҳамда холис асосда олиб борилса, мазмунли мулоқотларда иштирок этишга тайёр.

Ироқчий минтақадаги ташвишли ўзгаришларга тўхталиб, минтақадан ташқари кучларнинг аралашуви ҳамда сионистик режимнинг тажовузкор сиёсати минтақадаги беқарорликнинг асосий сабаблари эканини билдирди. У хавфсизлик масаласида ҳар бир минтақавий давлатнинг тақдири ўзаро боғлиқ эканини таъкидлаб, ҳар қандай уруш ёки беқарорлик бутун минтақани қамраб олишини қайд этди.

Эрон дипломатияси раҳбари шунингдек, мамлакатнинг мудофаа ва ракета салоҳиятлари ҳеч қандай ҳолатда музокара мавзуси бўлмаслигини қатъий таъкидлаб, миллий хавфсизлик Эрон учун музокара қилиб бўлмайдиган қизил чизиқ эканини билдирди. Унинг сўзларига кўра, Эрон музокараларга тайёр бўлгани каби, ўзини ҳимоя қилишга ҳам тўла тайёр ва ҳар қандай тажовуз икки томонлама тўқнашув доирасидан чиқиб кетадиган оқибатларга олиб келади.

Ироқчий сўзининг давомида Теҳрон ва Анқара ўртасидаги тарихий ва дўстона муносабатларга ишора қилиб, Туркия ҳукуматининг сўнгги воқеалар ва Эронга қарши сионистик режим тажовузларига нисбатан принципиал ва қўллаб-қувватловчи позициясини юксак баҳолади.

Туркия ташқи ишлар вазири Ҳакан Фидан эса Анқаранинг Эронга қарши ҳар қандай ҳарбий ҳаракатларга қарши эканини таъкидлаб, минтақадаги кескинликни камайтириш учун ядровий музокараларни конструктив муҳитда қайта бошлаш зарурлигини билдирди ҳамда тинчлик, барқарорлик ва хавфсизликни таъминлашда дипломатиянинг ҳал қилувчи ўрнига урғу берди.