Лорижоний: Эрон уруш изламайди, аммо таҳдид олдида таслим бўлмайди
-
Лорижоний: Эрон уруш изламайди, аммо таҳдид олдида таслим бўлмайди
Эрон Миллий хавфсизлик олий кенгаши котиби ядровий музокаралар, минтақавий ўзгаришлар ва қаршилик ўқи ҳолати бўйича Эрон позицияларини баён қилиб, Теҳрон уруш изламаслигини, бироқ айни пайтда адолатли музокара ва тийиб туриш салоҳиятини мустаҳкамлаш йўлини давом эттираётганини таъкидлади.
«Pars Today» хабарига кўра, Эрон Миллий хавфсизлик олий кенгаши котиби Али Лорижоний «Ал-Жазира» Қатар телеканалига берган интервьюсида Теҳрон мамлакат миллий хавфсизлигига зарар етказмаган ҳолда хавотирларни бартараф этадиган адолатли ядровий музокараларга киришишга тайёрлигини маълум қилди.
Эрон Миллий хавфсизлик олий кенгаши котиби Масқатдаги сўнгги музокаралар ҳақида сўз юритар экан, АҚШ талабларига ёзма жавоб олиб бормаганини ва амалга оширилган ишлар фақат фикр алмашишдан иборат бўлганини, бу жараён ҳали ҳам давом этаётганини айтди. Унинг қўшимча қилишича, минтақадаги давлатлар ҳам Эрон ядровий дастури бўйича сиёсий ечимга эришилишини қўллаб-қувватламоқда.
Лорижоний таъкидлашича, Теҳрон ижобий музокараларга тайёр, бироқ бу музокаралар адолатли ва оқилона бўлиши, вақтни чўзиш ёки ядровий доирадан ташқари мавзуларни мажбуран юклаш воситасига айланмаслиги шарт. У Эроннинг ядровий қуролга эга бўлишининг олдини олишни эҳтимолий келишув шаклланиши учун умумий нуқта сифатида баҳолади.
Шунингдек, у Эрон Ядровий қуролларни тарқатмаслик тўғрисидаги шартнома (NPT) доирасида Халқаро атом энергияси агентлиги назоратини қабул қилишини, бироқ «ноль бойитиш» ҳақидаги гапларни нореал деб ҳисоблашини билдирди. Унинг айтишича, ядровий билимни сиёсий қарор билан йўқ қилиб бўлмайди ва Эроннинг тиббий ҳамда тадқиқот эҳтиёжлари мавжуд.
Лорижоний сўнгги музокараларда Эрон ракет дастури муҳокама қилинмаганини ва бу масала мамлакат миллий хавфсизлиги ҳамда мудофаа тийиб туриш тизимининг бир қисми бўлиб, музокара мавзуси эмаслигини таъкидлади.
У кенг кўламли уруш эҳтимолини паст деб баҳолаб, ўтмиш тажрибаси кескинлик кучайиши уни бошлаганлар фойдасига бўлмаганини кўрсатганини айтди. У Эрон барча сценарийларга тайёр эканини, бироқ можарони алангалатишни истамаслигини қайд этди.
Лорижоний Саудия Арабистони, Туркия ва Миср каби давлатларнинг ҳарбий ҳаракатларга қарши позицияларини минтақавий портлаш хавфини англаш белгиси сифатида баҳолади ва ўзаро ҳурмат асосида муносабатларни мустаҳкамлашга Эрон тайёр эканини билдирди. Шунингдек, у Қатарнинг воситачиликдаги ролини юқори баҳолади.
Эрон Миллий хавфсизлик олий кенгаши котиби Хитой ва Россия билан ҳамкорлик умумий манфаатларга асосланганини ва уларнинг БМТ Хавфсизлик кенгашида Эронни қўллаб-қувватлаши сиёсий шерикликни кўрсатишини айтди. Унинг таъкидлашича, Эроннинг Шарққа юзланиши Ғарбнинг ваъдаларга риоя қилмагани натижасидир.
Лорижоний сўзи якунида яна бир бор таъкидлади: Эрон уруш изламайди, аммо таҳдид олдида таслим бўлмайди ва музокара ҳамда тийиб туришнинг уйғунлашган йўлига таянади.
