ЕИ ва Марказий Осиёнинг Афғонистон бўйича махсус вакиллари мулоқот қилдилар
-
ЕИ ва Марказий Осиёнинг Афғонистон бўйича махсус вакиллари мулоқот қилдилар
Шавкат Мирзиёевнинг Афғонистон бўйича махсус вакили Исматулла Эргашев бошчилигидаги мамлакат делегацияси Ашхободда Европа иттифоқи ва Марказий Осиё давлатларининг Афғонистон бўйича махсус вакилларининг тўртинчи учрашувида иштирок этди
Учрашувда Европа иттифоқининг Марказий Осиё бўйича махсус вакили Тери Ҳакала, Европа Иттифоқининг Афғонистон бўйича махсус вакили Томас Никлассон, БМТ Бош котибининг махсус вакили, БМТнинг Афғонистондаги миссияси раҳбари Роза Отунбаева, Жаҳон банки вакиллари (онлайн тарзда) ва Марказий Осиё давлатларининг Афғонистон бўйича махсус вакиллари иштирок этди.
Европа Иттифоқи ва Марказий Осиё йиғилиши иштирокчилари афғон халқига инсонпарварлик ёрдами кўрсатишни давом эттириш, Афғонистоннинг яккаланиб қолишига йўл қўймаслик, мамлакатнинг хориждаги музлатилган активларига чекловларни ечиш зарурлигини таъкидладилар деб хабар қилган Кун сайти.
Афғонистон муваққат ҳукуматига халқаро ҳамжамиятнинг инклюзив ва вакиллик ҳукуматини яратиш, фуқаролар, айниқса аёллар ҳуқуқ ва эркинликларини ҳурмат қилиш, Афғонистон ҳудудидан террористик мақсадларда фойдаланишга йўл қўймаслик борасидаги талабларини бажариш юзасидан мурожаат қилинди.
Минтақадаги сув ресурсларидан биргаликда фойдаланиш масалаларига ҳам алоҳида эътибор қаратилди. Қўшни давлатлар манфаатларини ўзаро ҳисобга олиш, минтақа сув ресурсларидан оқилона фойдаланиш муҳимлиги қайд этилди.
Афғонистондаги вазиятни тартибга солиш бўйича Европа Иттифоқи ва Марказий Осиё мамлакатлари томонидан умумий таклифлар ишлаб чиқиш имкониятлари мавжудлиги таъкидланди.
Делегациялар Ўзбекистон президентининг БМТ шафелигида Халқаро музокаралар гуруҳини тузиш ташаббусини ижобий баҳолаб, бу БМТнинг Афғонистон бўйича “Йўл харитаси”ни ишлаб чиқишда ушбу форматдаги умумий таклифларнинг бир қисми бўлиши мумкинлигини қайд этди.
