Ўзбекистонда 17 киши хориждаги халқаро террорчилик ташкилоти сафига қўшилмоқчи бўлди

Ўзбекистонда 17 киши хориждаги халқаро террорчилик ташкилоти сафига қўшилмоқчи бўлгани аниқланди.

Ўзбекистон ИИВ матбуот хизматига таяниб, Аниқ сайтининг хабар қилишича, Ўзбекистон ИИВ-ДХХ ходимлари томонидан ҳамкорликда олиб борилган тезкор суриштирувлар давомида, 2007 йилда Тошкент вилоятида туғилган К.I. интернет тармоғида экстремистик ғоялар таъсирига тушиши натижасида 16 нафар яқин танишлари билан ноқонуний “жамоат” бўлиб йиғилиб, келгусида хорижда фаолият олиб бораётган “Ислом давлати” халқаро террорчилик ташкилотлари сафига қўшилишни режалаштиргани аниқланган. 

Хабарга кўра, мазкур ҳолат юзасидан жиноят кодексининг 244-моддаси (оммавий тартибсизликлар) билан жиноят иши қўзғатилди.

Ушбу моддага кўра, оммавий тартибсизликларга ва фуқароларга нисбатан зўравонлик қилишга омма олдида даъват қилиш БҲМнинг 100 бараваридан 300 бараваригача жарима ёки икки йилгача ахлоқ тузатиш ишлари ёхуд уч йилдан беш йилгача озодликни чеклаш ёки уч йилдан беш йилгача озодликдан маҳрум қилиш билан жазоланади.

Ўша ҳаракатлар бир гуруҳ шахслар томонидан олдиндан тил бириктириб содир этилган бўлса БҲМнинг 300 бараваридан 400 бараваригача жарима ёки икки йилдан уч йилгача ахлоқ тузатиш ишлари ёхуд беш йилдан 10 йилгача озодликдан маҳрум қилиш билан жазоланади.

“Лоқайдлик ва ишонувчанлик оқибатида интернет тармоғи орқали ёт ғоялар таъсирига тушиб қолмаслик учун фуқароларимизни доимо огоҳ бўлишига чақирамиз. Ўзингизнинг тақдирингизга бефарқ бўлманг”, дейилади ИИВ хабарида.