Истанбулда аэропортга қўниш вақтида ҳалокатга учраган самолёт (фотожамланма)

Истанбулдаги Сабиҳа Гўкчен номидаги аэропортда Pegasus авиакомпаниясига тегишли самолёт қўнишни амалга ошириш вақтида фалокатга учрагани ҳақида хабар берилганди. «РБК» нашри фалокатга учраган самолётнинг суратларини тўплаб тақдим этди.

Маълумотларга кўра, самолёт бортида 183 киши бўлган. Самолёт фалокат оқибатида бўлакларга ажралиб кетган бўлса-да, ҳеч ким ҳалок бўлмаган.

Pegasus Airlines авиакомпаниясига тегишли самолёт Истанбулга Измир шаҳридан учиб келаётган бўлган.

Учувчиларнинг диспетчер билан мулоқотига кўра, самолёт кучли шамол вақтида қўнишга уринган.

Ичида 177 нафар йўловчи ва 6 нафар экипаж аъзоси бўлган ҳаво кемаси қўниш йўлагидан чиқиб кетиб, тўсиқларни босиб ўтиб, чуқурликка қулаган.

Фалокат оқибатида ёнғин юзага келган, бироқ у тезда ўчирилган.

Ҳаво кемаси бир неча бўлакка бўлиниб кетган.

Айрим йўловчилар самолётни мустақил равишда тарк этишга муваффақ бўлган.

Самолёт фалокатига расман нима сабаб бўлгани ҳозирча номаълум, бироқ тахминларга кўра, ноқулай об-ҳаво шароит сабаб бўлган бўлиши мумкин.

Камида 52 кишига жароҳат етган ва улар шифохонага жойлаштирилган.