Ўзбекистон-Қозоғистон вазирликлараро маслаҳатлашувлари бўлиб ўтди

Ўзбекистон ва Қозоғистон муносабатлари

2017 йилнинг 11 май куни Ўзбекистон Республикаси Ташқи ишлар вазирлигида Ўзбекистон-Қозоғистон вазирликлараро маслаҳатлашувлари бўлиб ўтди. Унда қатнашиш учун Қозоғистон Республикаси Ташқи ишлар вазирлиги Консуллик хизмати департаменти директори Ардак Мадиев бошчилигидаги делегация Тошкент шаҳрига ташриф буюрди. Бу ҳақда ТИВ матбуот хизмати хабар берди.

Конструктив руҳда ўтган маслаҳатлашувлар чоғида консуллик соҳасидаги икки томонлама муносабатларнинг ҳозирги ҳолати атрофлича муҳокама қилинди, томонлар фуқароларининг ҳуқуқ ва эркинликларини ҳимоя қилиш, фуқаролик, оилавий ва жиноят ишлари бўйича ҳуқуқий ёрдамнинг амалий жиҳатлари, Ўзбекистон билан Қозоғистон ўртасидаги келишувлар ҳамда халқаро конвенцияларнинг бажарилиши кўриб чиқилди.

Учрашувда делегациялар мазкур соҳада, жумладан миграция масалалари бўйича икки давлат қонунчилигида кучга кирган ўзгартиришлар тўғрисидаги маълумотлар билан ҳам алмашишди.