Эроннинг нанотехнологик мотор мойи; ёнилғи сарфини камайтирувчи керамик қатлам

Эроннинг билимга асосланган компанияси нанотехнологик мотор мойини ишлаб чиқарди. У моторнинг ички қисмлари юзасида ҳимоя қатламини ҳосил қилиб, деталлар ўртасидаги ишқаланишни камайтириши мумкин.

Парс Тудей» «Меҳр» ахборот агентлигига таяниб хабар беришича, автомобилларда ёнилғи сарфи ва зарарли чиқиндиларнинг кўпайиши энергияни бошқариш ва атроф-муҳит муҳофазасининг муҳим муаммоларидан бирига айланган шароитда мотор самарадорлигини ошириш ва деталлар ўртасидаги ишқаланишни камайтириш ёнилғи сарфини пасайтириш ҳамда автомобилнинг хизмат муддатини узайтиришга ёрдам бериши мумкин. Шу мақсадда Эроннинг «Ориён Петро Идеа» билимга асосланган компанияси керамик нанозаррачалардан фойдаланган ҳолда SN 10W-40 даражали нанотехнологик мотор мойини ишлаб чиқарди.

Ишлаб чиқарувчининг айтишича, ушбу маҳсулот моторнинг металл қисмлари юзасида ҳимоя қатламини ҳосил қилиб, ишқаланиш ва ишлаш ҳароратини камайтиради. Шунингдек, у ёнилғи сарфи, мой ёниши, мотор тебраниши ва зарарли газлар чиқишини камайтириб, автомобилнинг ишлаш самарадорлигини яхшилаши мумкин.

Компания томонидан берилган маълумотларга кўра, мой таркибидаги нанозаррачалар цилиндр юзасидаги майда чизиқлар, тирналишлар ва ғовакларга кириб, ушбу қисмдаги нотекисликларни маълум даражада қоплайди. Бу жараён деталлар ўртасидаги ишқаланишни камайтиради ва натижада моторнинг ишлаш ҳароратини ҳам пасайтириши мумкин. Ушбу технология бўйича ўтказилган синовлар ёнилғи сарфининг камайиши, автомобил тезланишининг яхшиланиши, шунингдек, мой ёниши ва мотор тебранишининг сезиларли даражада камайганини кўрсатган.