«Политико»: Европа Иттифоқи келаётган қишда газнинг жиддий танқислигига дуч келади

«Политико» нашри АҚШнинг «Энергетика иқтисодиёти ва молиявий таҳлил институти» (IEEFA) маълумотларига таяниб ёзишича, Европа Иттифоқига аъзо мамлакатлар келаётган қишда 14 миллиард куб метргача табиий газ танқислигига дуч келиши мумкин. Бу уларнинг йиллик газ истеъмолининг тахминан етти фоизига тенг.

ParsToday ИРНА ахборот агентлигига таяниб хабар беришича, «Политико» нашри АҚШнинг «Энергетика иқтисодиёти ва молиявий таҳлил институти» (IEEFA) маълумотларига асосланиб ёзишича, Европа Иттифоқига аъзо мамлакатлар келаётган қишда 14 миллиард куб метргача табиий газ танқислигига дуч келиши мумкин. Бу уларнинг йиллик газ истеъмолининг тахминан 7 фоизига тенг.

«Политико» ҳисоботида таъкидланишича, табиий газ танқислигининг сабаблари Ғарбий Осиёдаги можаролар туфайли жаҳон энергетикаси таъминотидаги узилишлар, истеъмолнинг ортиши ва Европа мамлакатлари омборларидаги захираларнинг камлигидан иборат.

Ҳисоботда қайд этилишича, октябрь ойининг бошида Европа Иттифоқига аъзо мамлакатларнинг ер ости газ омборлари 70 фоиздан сал кўпроқ тўлдирилган. Бу 2011 йилда маълумотлар қайд этила бошланганидан бери йилнинг шу даври учун энг паст кўрсаткич ҳисобланади. Шу билан бирга, газ нархи сўнгги тўрт йилдаги энг юқори даражага яқинлашган. Эҳтимолий газ танқислиги Европадаги 10–12 миллион хонадоннинг энергия эҳтиёжига тенг.

Ҳисоботга кўра, мавжуд муаммоларни янада кучайтирадиган омиллардан бири — Европа Иттифоқига аъзо мамлакатларнинг Россиядан суюлтирилган табиий газ сотиб олиш бўйича узоқ муддатли шартномалар тузишига тақиқ жорий этилишидир. Ушбу чора 2027 йил январь ойида кучга кириши режалаштирилган. Бу Россиядан газ импортини яна 7 миллиард куб метрга камайтириб, вазиятни янада оғирлаштириши мумкин.

«Политико» нашри аввалроқ ҳам жаҳон энергетика инқирози ва нархларнинг кескин ошиши ҳақидаги ҳисоботида Европа Комиссияси Европа Иттифоқига аъзо мамлакатларга йўллаган мактубида нархларни жиловлаш учун газ ва электр энергияси истеъмолини камайтириш зарурлигидан огоҳлантирганини ёзган эди.

«Политико» хабар беришича, Европа Иттифоқининг энергетика ва уй-жой масалалари бўйича комиссари Дан Йёргенсен иттифоққа аъзо мамлакатлар энергетика вазирларига йўллаган мактубида шундай деб ёзган: «Жаҳон миқёсида таъминот чекланган ва нархлар кескин ўзгариб турган шароитда талабни камайтириш нархларни жиловлашнинг самарали воситаси бўлиши мумкин».