ФАОнинг жаҳон кўргазмасида Эроннинг анъанавий таомлари кенг кутиб олинди
Рим шаҳрида «Уруғдан таомгача» номли жаҳон кўргазмасида Эроннинг ошпазлик санъати ва анъанавий таомлари таъми ташриф буюрувчилар ҳамда ушбу халқаро тадбир масъуллари томонидан қизғин кутиб олинди.
ParsToday ИРНА ахборот агентлигига таяниб хабар беришича, Бирлашган Миллатлар Ташкилотининг Озиқ-овқат ва қишлоқ хўжалиги ташкилоти (ФАО) жаҳон кўргазмасининг якшанба куни Рим шаҳридаги тарихий «Сирко Массимо» мажмуасида бўлиб ўтган тўртинчи кунида Эроннинг анъанавий таомларини таништириш ва уларни тайёрлашни ўргатишга бағишланган махсус дастур ўтказилди. Эронлик ошпазлар иштирокида ташкил этилган ушбу тадбирда 100 нафардан ортиқ қатнашчи Эроннинг асл миллий таомларини татиб кўриш имконига эга бўлди.
Халқларнинг озиқ-овқат маданияти билан таништиришга бағишланган махсус бўлимда ўтказилган ушбу дастурда эронлик ошпазлар чаловкабоб ва таҳчин каби таомларни тайёрлаб, уларни пишириш жараёнини намойиш этдилар. Шунингдек, улар таомларнинг асосий масаллиқлари, тайёрланиш усуллари ва Эрон озиқ-овқат маданиятидаги ўрни ҳақида маълумот бердилар.
Ошпазлик дастури доирасида жонли ижро этилган Эрон мусиқаси ҳам тадбирга маданий руҳ бағишлаб, Эрон санъати, анъаналари ва озиқ-овқат меросининг турли қирраларини ташриф буюрувчилар эътиборига ҳавола этди.
Эрон Ислом Республикаси Римдаги «Уруғдан таомгача» номли жаҳон кўргазмасида ўзининг озиқ-овқат маданиятини таништириш билан бир қаторда, Осиё ва Тинч океани минтақаси бўлимида павильон ташкил этиб, заъфарон, писта ва хурмо каби Эроннинг бир қатор муҳим қишлоқ хўжалиги маҳсулотларини намойишга қўйди.
Таъкидланишича, Эроннинг ушбу кўргазмада иштирок этишидан мақсад мамлакатнинг ишлаб чиқариш салоҳияти ва қишлоқ хўжалиги маҳсулотлари хилма-хиллигини таништириш, шунингдек, ташриф буюрувчиларни Эрон озиқ-овқат маҳсулотларини ишлаб чиқариш ва қайта ишлаш занжири билан таништиришдан иборат.
