Эрон Космик агентлиги раҳбари: «Порс-2» сунъий йўлдоши учирилиши режасига киритилган
Эрон Космик агентлиги раҳбари мамлакатда янги масофадан зондлаш сунъий йўлдоши тайёрланаётганини маълум қилиб, шундай деди: «Порс-2» номли Эрон сунъий йўлдоши «Поя» сунъий йўлдошининг янада такомиллаштирилган намунаси бўлиб, 3 метрдан юқори тасвирга олиш аниқлиги билан якунланган ва учириш дастурига киритилган.
Парс Тудей хабар беришича, Эрон Космик агентлиги раҳбари Ҳасан Салария якшанба куни Бутунжаҳон космос ҳафталигини нишонлаш маросимида Эрон космик саноатидаги ютуқларга ишора қилиб, шундай деди: Эроннинг биринчи телекоммуникация сунъий йўлдоши «Наҳид-2» муваффақиятли равишда орбитага чиқарилди ва ушбу сунъий йўлдош синовларининг асосий қисми муваффақиятли ўтказилди. Мазкур лойиҳа Эрон Космик тадқиқотлар институти мутахассислари томонидан Алоқа вазирлиги таркибидаги мажмуада ҳамда билимга асосланган компаниялар тармоғи кўмагида ишлаб чиқилди ва айни пайтда унинг янада илғор авлодлари ҳам яратилмоқда.
У яна бир катта ютуқ сифатида космик ракеталарнинг ишлаш самарадорлигини барқарорлаштиришни қайд этиб, шундай деди: «Қоим-100» сунъий йўлдош ташувчи ракетасининг ишлаш самарадорлигини барқарорлаштиришни ҳам алоҳида таъкидлаш лозим. Шунингдек, «Чамрон» сунъий йўлдошининг вазифалари тўлиқ муваффақиятли бажарилди. Ушбу сунъий йўлдош орбитада сунъий йўлдош ҳолатини бошқариш алгоритмларини ишлаб чиқиш доирасида мамлакатдаги биринчи орбитал яқинлашувни амалга оширди ва бу жуда катта ютуқ ҳисобланади.
Салария сўзининг давомида оғир юкларни учиришга тўхталиб, шундай деди: «Кейинги ютуқ “Симурғ” сунъий йўлдош ташувчи ракетаси томонидан энг оғир юкнинг учирилиши бўлди. Бу йўналишда Эрон Мудофаа вазирлиги тизимидаги ҳамкасбларимиз иш олиб бормоқда. Шунингдек, Эрон Космик тадқиқотлар институти томонидан тақдим этилган “Самон” орбитал узатиш блоки симулятори дастурий таъминоти “Симурғ” сунъий йўлдош ташувчи ракета ёрдамида синовдан ўтказилди. Янада илғор намуналари ҳам яратилаётган “Самон” блоки юқори орбиталарга чиқишда муҳим роль ўйнайди».
Алоқа вазири ўринбосари яна бир муҳим воқеа сифатида масофадан зондлаш тизимларининг ишлаш самарадорлигини қайд этиб, шундай деди: «Поя» сунъий йўлдошининг тўлиқ ишлаши ҳам космик саноатдаги бошқа рекордлардан биридир. Бу сунъий йўлдош устида ҳамкасбларимиз Саъоирон мажмуасида иш олиб бормоқда. Ушбу сунъий йўлдош ўтган йили орбитага чиқарилди ва унинг камераси ҳамда барча турли қуйи тизимлари Эронда тўлиқ маҳаллий имкониятлар асосида ишлаб чиқилди. Ҳозирда ушбу сунъий йўлдошнинг янада илғор авлодлари ҳам яратилмоқда ва тасвирга олишнинг юқори аниқлиги унинг муҳим хусусиятларидан бири ҳисобланади».
Эрон Космик агентлиги раҳбари, шунингдек, янги масофадан зондлаш сунъий йўлдоши тайёрланаётганини маълум қилиб, шундай деди: «Порс-2» сунъий йўлдоши «Поя» сунъий йўлдошининг янада илғор намунаси бўлиб, 3 метрдан юқори аниқликда тасвирга олиш имконияти билан якунланган ва иншооллоҳ, учириш дастурига киритилган. Бу борадаги тафсилотлар кейинроқ эълон қилинади.
