"Ўзбекнефтегаз" ва "Газпром" стратегик ҳамкорлик тўғрисидаги келишувни имзолади
-
"Ўзбекнефтегаз" ва "Газпром"
2 июнь куни Ўзбекистон бош вазири ўринбосари - "Ўзбекнефтегаз" бошқарувчилар кенгаши раиси Ғуломжон Ибрагимов ва "Газпром" раҳбари Алексей Миллер стратегик ҳамкорлик тўғрисидаги келишувни имзолади. Бу ҳақда "Газпром" матбуот хизматига таяниб Кун.ўз сайти хабар қилди.
Ҳужжатни имзолаш маросими Петербург халқаро иқтисодий форуми доирасида бўлиб ўтди.
Ҳужжат билан Ўзбекистон ҳудудида янги лойиҳаларни амалга оширишда томонларнинг ўзаро ҳаракатлари назарда тутилган. Хусусан, газ инфратузилмаси объектларини реконструкция қилиш, қуриш ва фойдаланиш, геология-қидирув ишлари, углеводородларни қазиб олиш, қайта ишлаш ва сақлаш, сиқилган ва суюлтирилган табиий газни авнотом газификацияда фойдаланиш, Ўзбекистон газ таъминотининг Бош схемасини ишлаб чиқиш шулар жумласидан.
Ғуломжон Ибрагимов ва Алексей Миллернинг амалий учрашуви ҳам бўлиб ўтди. Унда томонлар имзоланган келишувни юқори баҳолашди. Таъкидланишича, уни амалга ошириш республика газ соҳасининг ривожига ижобий таъсир кўрсатади.
