Трамп Мирзиёевни интизорлик билан кутмоқда

АҚШ Президенти Дональд Трамп Президент Шавкат Мирзиёевга мактуб йўллаган.

 Унда Трамп Мирзиёевнинг Афғонистонга доир халқаро анжуман ташаббусини қўллаб-қувватлаган.

Мактубда айтилишича, Оқ Уй Тошкентга юбориладиган "ҳайъат таркибини кўриб чиқмоқда".

Трамп Мирзиёевнинг минтақавий ташаббусларини "муваффақиятли" деб атаган.

У Ўзбекистон раҳбари билан учрашишни "интизорлик билан кутиши"ни айтган.

Учрашув санаси номаълум. Ўтган йил декабрида ўзбек томони Трамп Мирзиёевни АҚШга таклиф қилганини билдирганди.

Мирзиёев ва Трамп ўтган йил сентябрида Нью-Йоркдаги БМТ Бош Ассамблеясида кўришган.

Унгача президентларнинг танишуви Ар-Риёддаги АҚШ ва Араб дунёси саммитида юз берганди.

Қўшма Штатлар Ўзбекистон ижтимоий-иқтисодий соҳада бошлаган ислоҳотларни қўллаб-қувватлаган.

АҚШнинг Тошкентдаги элчихонаси Ўзбекистон қамоқхоналаридаги сиёсий фаоллар ва журналистларнинг озод этилишини олқишлаб чиққан.