ШҲТ саммитида Мирзиёев ва Путин қандай масалаларни муҳокама қилишди?

ТОШКЕНТ, 9 июн — Sputnik. Шавкат Мирзиёев 9 июн куни Хитойнинг Циндао шаҳрида Россия президенти Владимир Путин билан учрашди. Бу ҳақда президент матбуот хизмати хабар қилди.

Ўзбекистон президенти Владимир Путинни Россия президентлигига қайта сайлангани билан яна бир бор табриклаб, Россия билан стратегик шериклик ва иттифоқчилик муносабатлари Ўзбекистон ташқи сиёсатининг ўзгармас йўналиши эканини таъкидлаб ўтди.

"Бир йилда ўзаро 70 та делегация ташрифи амалга оширилгани, 21 марта ҳудудлараро учрашувлар ўтказилгани алоқаларнинг бугунги суръати ва миқёсидан далолат беради. Жорий йилнинг биринчи чорагида мамлакатларимиз ўртасидаги товар айирбошлаш ҳажми 40 фоиздан зиёд ўсган. Ҳали олдинда яна йирик лойиҳаларимиз кўп", — деди Шавкат Мирзиёев.

Россия президенти Шавкат Мирзиёев билан учрашувдан мамнунлигини таъкидлаб, икки давлат ҳамкорлигида кўплаб самарали лойиҳалар амалга оширилаётганини алоҳида қайд этди.

Ўтган йили Россияга ташрифингиздан кейин ҳаммаси ижобий томонга ўзгарди. Сизнинг ташаббусингиз билан чегаралардан ўтишда "яшил йўлак" ташкил этилгани натижасида Ўзбекистон мева-сабзавотларини етказиб бериш қарийб 36 фоиз ошди. Россиянинг етакчи компаниялари иштирокида йирик инвестиция лойиҳалари амалга оширилмоқда", — деди Владимир Путин.

"Лукойл" компанияси Ўзбекистонга 7 миллиард доллар инвестиция киритгани, жорий йил апрелда Қандим газни қайта ишлаш мажмуаси ишга туширилгани қайд этилди. Шунингдек, "Росатом" Атом энергияси бўйича давлат корпорацияси билан энергетика соҳасида шериклик ва илмий-техникавий ҳамкорликни янада ривожлантиришга келишиб олингани таъкидланди.