Францияда норозилик намойишлари давом этмоқда: «Сариқ жилетлилар» ва ўқувчилар кўчаларга чиқди
Париж ва Франциянинг яна бир неча шаҳрида шанба куни турмуш харажатларининг қимматлашуви, ёқилғи нархларининг ошиши ва таълим тизимидаги вазиятнинг ёмонлашувига қарши норозилик намойишлари тўлқини кузатилди.
ParsToday хабар беришича, Меҳр ахборот агентлигига таяниб, Франция пойтахти Париж ва мамлакатнинг бир қатор бошқа шаҳарларида шанба куни кенг кўламли норозилик намойишлари бўлиб ўтди. Париж кўчаларига юқори синф ўқувчилари ва «Сариқ жилетлилар» ҳаракати аъзолари чиққан бир вақтда, намойишчилар билан полиция кучлари ўртасидаги дастлабки тўқнашувлар ҳақида ҳам хабарлар тарқалди.
Асосий намойиш маҳаллий вақт билан соат 14:00 да Париждаги Республика майдонида бошланиши режалаштирилган эди. Бироқ намойишчилар гуруҳлари бир неча соат олдинданоқ шаҳарнинг турли нуқталарида тўплана бошлаган эди. Хавфсизлик кучлари ҳам Париж ва бошқа йирик шаҳарларда юқори шайлик ҳолатига келтирилди.
Намойишчилар турмуш харажатлари, ёқилғи ва энергия нархлари ошишини жиловлаш, иш ҳақи ва пенсияларни ошириш, шунингдек, давлат хизматлари ва таълим шароитларини яхшилашни талаб қилмоқда.
Оммавий ахборот воситалари хабарларига кўра, Франция полицияси Париждаги Республика майдонида тўпланган одамларни тарқатиш учун кўздан ёш оқизувчи газ қўллаган. Шунингдек, намойишларда иштирок этиш учун майдонга кирмоқчи бўлган шахслар полиция томонидан текширилгани ва уларнинг айрим буюмлари мусодара қилингани ҳақида ҳам хабар берилди.
Марсель шаҳрида ҳам ижтимоий шароитларга қарши умуммиллий сафарбарлик доирасида намойишлар бўлиб ўтди.
Ижтимоий тармоқларда аввалги норозилик ҳаракатлари аъзоларини намойишларга қўшилишга чақирувчи мурожаатлар кенг қўллаб-қувватланди. Бу ҳолат Франциядаги норозилик намойишларининг янада кенгайишига олиб келиши мумкин.
«Сариқ жилетлилар» ҳаракати 2018 йилда ёқилғи солиғига қарши норозиликлар натижасида пайдо бўлган, аммо кейинчалик унинг қамрови нархларнинг қимматлашуви ва даромадлар тенгсизлигидан норозиликни ҳам ўз ичига олган. Макрон бир неча миллиард евро қийматидаги солиқ имтиёзларини жорий этишга рози бўлганидан сўнг, ушбу ҳаракат фаолияти анча сусайган.
Францияда ўқувчилар намойишлари ва полициянинг зўравонлик билан бостириши камералар нигоҳида
