Ўзбекистонлик дзюдочилар яна 1 та олтин ва 2 та кумуш қўлга киритилди

Параосиё ўйинларида бугун Ўзбекистоннинг 4 вакили медаллар учун кураш олиб борди, улардан 3 нафари финал йўлланмасини қўлга киритди.

Кун.уз сайтига кўра, -73 кг вазн тоифасида гиламга чиққан Феруз Саидов жанубий кореялик Сеунгжун Янг билан бўлган баҳсда жароҳат олди ва кумуш медаль билан кифояланди. -81 кг вазн тоифаси вакили Нурбек Мирзаев ҳам олтин медаль учун кечган баҳсда жанубий кореялик рақибга дуч келди. Нурбек Юнгмин Ли билан баҳсда ғолиб чиқиб, чемпионга айланди.

Дзюдо бўйича аёллар ўртасидаги мусобақаларда -57 кг вазн тоифасида баҳсларда қатнашган Нафиса Шерипбаева ҳал қилувчи жангда хитойлик Лин Жилианга мағлуб бўлди ва делегация ҳисобига навбатдаги кумуш медални қўшиб қўйди.

Шу тариқа, 9 октябрда Ўзбекистон вакиллари ҳозирча 2 та олтин ва 2 та кумуш медалларини жамғаришга муваффақ бўлди. Умумий ҳисобда медаллар сони 25 тага етди, шундан 15 таси олтин.