Хитой билан ҳамкорликда Самарқандда қон препаратлари ишлаб чиқарувчи завод қурилади

Самарқандда Хитой давлати билан ҳамкорликда қиймати 250 миллион долларни ташкил этувчи қон препаратлари ишлаб чиқарилади.

Ўзбекистон Соғлиқни сақлаш вазирлигида бўлиб ўтган учрашувда Хитойнинг “Xindeyuan Bioengineering” компанияси вакиллари билан Самарқандда Хитой билан ҳамкорликда қон препаратлари ишлаб чиқариш масаласида музокра ўтказилди.
Кейинги йилларда юртимизда ноёб юрак операциялари, инсон тана аъзоларини кўчириб ўтказиш каби мураккаб жарроҳлик амалиётларининг йўлга қўйилиши ҳамда хавфли касалликлар диагностикасининг яхшиланиши сабабли сифатли қон компонентларига бўлган эҳтиёж янада ортди.

Бугун битта жигар трансплантацияси учун 30 литргача қон плазмаси зарур. Шунинг ўзиёқ қоннинг аҳамияти нақадар муҳим эканини кўрсатади. Шу жиҳатдан олганда гематологик, онкогематологик ва бошқа даволаш қийин бўлган касалликларга чалинган беморларга тиббий ёрдам кўрсатиш, уларни зарур қон компонентлари ва дори воситалари билан таъминлаш, ушбу касалликлар профилактикасини кучайтириш долзарб масалалардан бири”, дейилади ССВ хабарида.

Хитой компанияси вакиллари билан учрашувда Самарқанд вилояти “Ургут” эркин иқтисодий зонасида умумий қиймати 250 миллион долларлик инвестициявий лойиҳани амалга ошириш борасида келишувга эришилган.

Янги завод 15 гектар майдонда қурилиши ва у қон препаратлари ишлаб чиқаришга ихтисослаштирилган Марказий Осиёдаги ягона завод бўлиши кутилмоқда.