Россияда террорчиларга кўмаклашганликда айбланиб 6 нафар марказий осиёлик қўлга олинди

Петербургда террорчиларнинг хабарчилари сифатида гумон қилинган 6 киши қўлга олинди

Санкт-Петербургда «Ўрта Осиё республикаларидан Россияга ишлаш учун келган» 6 киши қўлга олинди. Бу ҳақда Россия Тергов қўмитаси маълум қилди.

Қўлга олинган шахслар террорчилар сафига янги одамларни ёллаш ва Россия ҳудудида «Жебҳат ан-Нусра» ва ИШИД каби ноқонуний ташкилотлар тарғиботи билан шуғулланишда гумон қилинган.

Тергов қўмитасининг Санкт-Петербург бўйича бошқармаси РФ Жиноят кодексининг 1 қисм, 205.1 моддаси (террорчилик фаолияти билан шуғулланиш) бўйича иш очган. Хабарда айтилишича, тинтув вақтида гумонланувчиларнинг яшаш жойларидан «экстремистик адабиётлар, ашё ва ҳужжатлар топилган ҳамда тергов учун мусодара қилинган».

Қўмитада қайд этилишича, ҳозирча ушбу қўлга олинган шахсларнинг Санкт-Петербургдаги теракт ижрочиси билан алоқадорлиги аниқланмаган. Бу масала тергов давомида ҳал қилинади.

Тергов қўмитаси 4 апрель куни 3 апрель кунги теракт ижрочисининг шахсини тасдиқлади. Терговнинг аниқлашича, 14 кишининг ўлими ва 49 кишининг жароҳатланишига сабаб бўлган портлаш Қирғизистонда туғилган, 2011 йилда Россия фуқаросига айланган 22 ёшли Акбаржон Жалилов томонидан содир этилганди. Тергов унинг эҳтимолий шерикларини қидирмоқда.