Таймс: Эпстин Моссад томонидан ёлланган агент бўлган

«Таймс» нашри хабар беришича, ФБР ҳужжатлари ва манбалари Жеффри Эпстин эҳтимол Моссад агенти бўлгани, жосуслик бўйича тайёргарликдан ўтгани ва сионистик режимнинг собиқ бош вазири Эҳуд Барак билан яқин алоқада бўлганини кўрсатмоқда.

Британиянинг «Таймс» нашри маълум қилишича, номдор миллиардер ва жинсий жиноятларда айбланган Жеффри Эпстин хорижий хавфсизлик хизмати томонидан ёлланган бўлиши мумкинлиги ҳақидаги хабарлар АҚШда жиддий эътибор қозонган. Ушбу материаллар ФБРнинг махфий ахборот берувчиси кўрсатмаларига таянади. Унинг айтишича, Эпстин аслида Моссад разведка хизмати томонидан ёлланган ва ҳатто жосуслик тайёргарлигидан ўтган.

Pars Today хабарига кўра, америкалик ёзувчи ва мотивацион маърузачи Дипак Чопра Жеффри Эпстинни Тел-Авивга сафарга таклиф қилган ва ҳатто унга тахаллусдан фойдаланишни таклиф этган.

«Таймс» маълум қилишича, Эпстин 2019 йилда ҳибсга олинишидан икки йил аввал, Тел-Авивдаги Менора залида маъруза қилиш учун келган ҳинд-америкалик Чопра билан учрашишга таклиф қилинган.

Янги ҳужжатлар шуни ҳам кўрсатадики, сионистик режимнинг собиқ бош вазири Эҳуд Барак ва унинг турмуш ўртоғи Нью-Йоркдаги Эпстин хонадонида мунтазам равишда бўлиб турган ва ҳатто унинг сўнгги ҳибси арафасида яна сафар қилишни режалаштирган. Ҳужжатларга кўра, бу алоқалар Эпстиннинг 2006 йилдаги биринчи ҳибсидан кейин ҳам давом этган.

Ҳужжатларга асосан, Барак 2013–2017 йиллар орасида Нью-Йоркдаги Эпстин уйига 30 мартадан ортиқ борган ва кўп ҳолларда у ерда тунган. У шунингдек, «Carbyne» номли кузатув компаниясининг асосчиларидан бири бўлиб, унда Исроилнинг бир қатор собиқ разведка ходимлари фаолият юритган.

Электрон мактублар шуни кўрсатадики, Исроилнинг собиқ разведка офицери, махфий операцияларда иштирок этган ва Баракнинг ишончли яқинларидан ҳисобланган Юни Корн 2013–2015 йиллар орасида бир неча бор ва ҳар сафар бир неча ҳафта давомида Манҳэттендаги Эпстин уйида яшаган.

Ҳозирда 20 йиллик қамоқ жазосига ҳукм қилинган Эпстиннинг яқин ҳамкори Гислейн Максвелл номи ҳам ушбу ҳужжатларда қайд этилган. Унинг отаси Роберт Максвелл йиллар давомида Исроил разведка доиралари билан алоқада бўлганликда айбланган эди.

Шу билан бирга, «Israel Times» нашри хабар беришича, ФБР манбаси Эпстиннинг машҳур ҳуқуқий ҳимоячиларидан бири Алан Дершовицнинг Исроил разведка агентлиги билан алоқасига гувоҳ бўлганини айтган ва Эпстин Моссад агенти бўлганига ишончи комил эканини билдирган. Манба шунингдек, Эпстин «жосус сифатида» собиқ бош вазир ва Исроил ҳарбий кучлари қўмондони Эҳуд Барак назорати остида тайёрланганини таъкидлаган.

Эпстин ишига оид ҳужжатларнинг сўнгги босқичда эълон қилиниши унинг алоқалари, усуллари ва ҳокимият марказларига яқинлиги ҳақидаги далиллар доирасини кенгайтирди. Бу ҳолат Эпстиннинг Моссад билан алоқалари ҳақидаги ривоятларни янада кучайтириб, бу борада чуқурроқ саволлар қўйишга туртки бермоқда.

Эпстейн; Ғарбнинг аёллар ҳуқуқини ҳимоя қилишдаги жиноят ва пасткўрлик