تاجیکستان سرانجام به افغانستان سفیر می‌فرستد؟

منابعی از افغانستان می‌گویند که در پی بهبود روابط تاجیکستان با طالبان، قرار است به زودی این کشور پس از سه سال سفیر به افغانستان بفرستد.

به گزارش رادیو دری، منابع می گویند "سَی‌مومن یتیم اف" رییس اداره اطلاعات تاجیکستان یک طرح صلح را با بقایای نظام جمهوریت افغانستان که در تاجیکستان حضور دارند به اشتراک گذاشته است.

گفته می شود امرالله صالح مخالف این طرح است اما احمد مسعود با آن موافقت کرده است.

این درحالی است که چندی پیش گفته شد که هیاتی از طالبان به سرپرستی رییس دادستان عالی این گروه به تاجیکستان رفته تا در مورد رسمی شدن روابط این گروه با دشمن‌ترین همسایه‌شان مذاکره کنند.

همچنین، گزارش‌هایی در ماه مارس سال گذشته به نشر رسید که طالبان به یکی از نمایندگی‌های افغانستان در تاجیکستان تسلط پیدا کرده است.

گفتنی است در آسیای مرکزی تاجیکستان تاکنون تنها دولتی بوده که به حکومت طالبان روی خوش نشان نداده و به عنوان سرسخت‌ترین منتقد آنان رفتار کرده است.

دوشنبه حکومت طالبان را به دلیل عدم تشکیل دولت فراگیر و زیر پا گذاشتن حقوق اقوام به خصوص تاجیک‌ها مورد انتقاد قرار می دهد.

با این حال گزارش های تایید نشده ای از بسته شدن دفاتر «جبهه مقاومت ملی» در تاجیکستان و خارج شدن احمد مسعود رهبر این جبهه از این کشور وجود دارد.

به گفته منابع در افغانستان، در حال حاضر سه دیپلمات تاجیک روند توزیع ویزا و خدمات کنسولی را در سفارت تاجیکستان در کابل انجام می دهند.