Պետրոս Ղազարյանն ու Հանրային հեռուստաընկերության գլխավոր պրոդյուսերն ազատվել են աշխատանքից
ԵՐԵՎԱՆ, 21 ԱՊՐԻԼԻ, ԱՐՄԵՆՊՐԵՍ։ Հանրային հեռուստաընկերության լրատվական ծառայության տնօրեն Պետրոս Ղազարյանը և հեռուստաընկերության գլխավոր պրոդյուսեր Վարդան Հակոբյանն, իրենց դիմումների համաձայն, ազատվել են աշխատանքից, Հանրային հեռուստառադիոընկերության խորհուրդն ընդունել է նաև Հանրային հեռուստաընկերության գործադիր տնօրեն Մարգարիտա Գրիգորյանի հրաժարականը։
«Արմենպրես»-ի փոխանցմամբ` այս մասին հայտարարություն է տարածել Հանրային հեռուստառադիոընկերության խորհուրդը։
«Հանրային հեռուստառադիոընկերության խորհուրդն ափոսոսանք է հայտնում ՀՀ վարչապետի տեսաուղերձի հեռարձակմանն առնչվող միջադեպի համար, որի հետևանքով Հանրային հեռուստաընկերության գործադիր տնօրեն Մարգարիտա Գրիգորյանը պարտավորված եղավ հրաժարական տալ։ Խորհուրդը հարգում է գործադիր տնօրենի անձնական պատասխանատվություն կրելու որոշումը՝ ընդունելով նրա հրաժարականը։ Միաժամանակ Խորհուրդն իր գնահատանքն է հայտնում Մարգարիտա Գրիգորյանին՝ Հանրային հեռուստաընկերության գործադիր տնօրենի պաշտոնում արդյունավետ, պրոֆեսիոնալ և անձնվեր աշխատանքի համար»,- նշված է հայտարարությունում։ Խորհուրդը Հանրային հեռուստաընկերության գործադիր տնօրենի ժամանակավոր պաշտոնակատար է նշանակել Հանրային հեռուստաընկերության ստեղծագործական հարցերով տնօրենի տեղակալ Արմեն Սարգսյանին։
«Իրենց դիմումների համաձայն՝ զբաղեցրած պաշտոններից ազատվել են նաև լրատվական ծառայության տնօրեն Պետրոս Ղազարյանը և հեռուստաընկերության գլխավոր պրոդյուսեր Վարդան Հակոբյանը։ Լրատվական ծառայության տնօրենի ժամանակավոր պաշտոնակատար է նշանակվել տնօրենի տեղակալ Ռուբեն Շահինյանը»,- հայտնում է խորհուրդը։
Առաջիկայում Խորհուրդը կձևավորի մրցութային հանձնաժողով և կհայտարարի մրցույթ Հանրային հեռուստաընկերության գործադիր տնօրենի պաշտոնի համար։
Ապրիլի 17-ին տեղի ունեցած ՀՀ վարչապետ Նիկոլ Փաշինյանի հեռուստատեսային ուղերձին նախորդած կադրերը հայտնվել են համացանցում։ Ուղիղ եթերն ապահովող Հանրային հեռուստաընկերությունը հայտնել է, որ ուղերձը հեռարձակելու համար բաց կապուղի է տրամադրել մի քանի լրատվամիջոցների։
https://armenpress.am/arm/news/1012912.html
