ՀՀ և Ուկրաինայի ԱԳ նախարարները քննարկել են հայ-ուկրաինական հարաբերությունների օրակարգային հարցեր
Հայաստանի Հանրապետության արտաքին գործերի նախարար Զոհրաբ Մնացականյանը հեռախոսազրույց է ունեցել Ուկրաինայի արտաքին գործերի նախարար Դմիտրի Կուլեբայի հետ։
Ինչպես հաղորդում է «Արմենպրես»-ը՝ վկայակոչելով AnalitikaUA.net կայքը, այս մասին հայտնել են Ուկրաինայի ԱԳՆ-ից։
«Զրուցակիցները քննարկել են երկուստեք հետաքրքրություն ներկայացնող բոլոր ուղղություններով երկկողմ համագործակցության վիճակն ու զարգացման հեռանկարները: Կողմերն ընդգծել են ուկրաինացի և հայ ժողովուրդների միջև պատմական ամուր կապերը։ Նախարարները հատուկ ուշադրություն են դարձրել նաև առևտրի զարգացման և տնտեսական երկխոսության խորացման հարցերին։ Արտաքին քաղաքական գերատեսչությունների ղեկավարները դրական են գնահատել հայ և ուկրաինացի քաղաքացիների վերադարձի հարցում փոխգործակցությունը և փոխանակվել են COVID-19 պանդեմիայի հետևանքների հաղթահարման փորձով»,- ասված է հաղորդագրության մեջ:
Պարբերականին մեկնաբանություն տալիս՝ Ուկրաինայի հայերի միության նախագահ Վիլեն Շատվորյանը կարևորել է նման մակարդակի պաշտոնական շփումները: ՈւՀՄ ղեկավարը հույս է հայտնել, որ այսուհետ նմանատիպ շփումներն ավելի հաճախ տեղի կունենան:
«Հայաստանի և Ուկրաինայի ԱԳ նախարարների շփումները մեծ հույս են ներշնչում», - նշել է Շատվորյանը։
Ավելի վաղ հաղորդվել էր, որ 2013 թվականից միջազգային համագործակցությունը դարձել Է Ուկրաինայի հայերի միության զարգացման գերակա ուղղությունը: ՈՒՀՄ ղեկավար Վիլեն Շատվորյանը նշել է, որ կազմակերպությունն ամեն ինչ անում է, որպեսզի հայ-ուկրաինական հարաբերություններն ավելի ամուր լինեն:
Armenpress.am
