Կառավարությունը փոփոխություններ է առաջարկում ընդերքի օգտագործման ընթացակարգում
ՀՀ ազգային ժողովն առաջին ընթերցմամբ ընդունելու համար քննարկում է Հայաստանի Հանրապետության ընդերքի մասին օրենսգրքում փոփոխություններ և լրացումներ կատարելու մասին և կից ներկայացված օրենքների նախագծերի փաթեթը:
«Արմենպրես»-ի փոխանցմամբ՝ այն խորհրդարանի հուլիսի 8-ի արտահերթ նիստում ներկայացրեց ՀՀ տարածքային կառավարման և ենթակառուցվածքների նախարարի տեղակալ Լիլիա Շուշանյանը:
«Օրինագծով առաջարկվող փոփոխությունները միտված են ընդերքը ռացիոնալ և արդյունավետ օգտագործելու նպատակին: Այսուհետ առաջարկում ենք արդյունահանման թույլտվությունը չտրամադրել այն դեպքում, եթե տվյալ տեղամասի հանքավայրի պաշարներն ուսումնասիրված և հաստատված չեն մետաղականի համար՝ վերջին 5 տարվա ընթացքում, իսկ ոչ մետաղականի համար՝ վերջին 10 տարվա ընթացքում»,- ասաց Շուշանյանը:
Փոխնախարարը նշեց, որ այսուհետև հանքավայրերը տրամադրվելու են ամբողջ պաշարով: Դրանք չեն տրոհվելու տարբեր տնտեսավարողների միջև:
Օրենքի նախագծով նախատեսված են նաև մի շարք այլ փոփոխություններ և կարգավորումներ:
Armenpress.am
