Նիկոլ Փաշինյան. «Կարևորում ենք ԵԱՏՄ գազի ընդհանուր շուկայի ձևավորումը»
Վարչապետի պաշտոնակատար Նիկոլ Փաշինյանն այսօր մասնակցել է Եվրասիական տնտեսական բարձրագույն խորհրդի հերթական նիստին, որն անցկացվել է տեսակոնֆերանսի ձևաչափով:
Նիստին մասնակցել են նաև Ռուսաստանի Դաշնության նախագահ Վլադիմիր Պուտինը, Բելառուսի նախագահ Ալեքսանդր Լուկաշենկոն, Ղազախստանի նախագահ Կասիմ-Ժոմարտ Տոկաևը, Ղրղզստանի նախագահ Սադիր Ժապարովը, ԵԱՏՄ-ում որպես դիտորդ Ուզբեկստանի Հանրապետության նախագահ Շավքաթ Միրզիյոևը և Կուբայի Հանրապետության նախագահ Միգել Մարիո Դիաս-Կանել Բերմուդեսը, ինչպես նաև Եվրասիական տնտեսական հանձնաժողովի կոլեգիայի նախագահ Միխայիլ Մյասնիկովիչը և Եվրասիական տնտեսական բարձրագույն խորհրդի պատվավոր նախագահ Նուրսուլթան Նազարբաևը:
Նիկոլ Փաշինյանն իր ելույթում, մասնավորապես, նշել է.
Հայաստանը վերահաստատում է իր հանձնառությունը առողջապահության ոլորտում Միության անդամ պետությունների միջև համագործակցության հետագա խորացմանը` ուղղված բնակչության առողջության բարելավմանը, հիվանդությունների կանխարգելման և դրանց դեմ պայքարի գործում փոխգործակցության և կոլեկտիվ ռազմավարական գործընկերության ամրապնդմանը, ինչպես նաև միջազգային ասպարեզում Միության անդամ պետությունների ընդհանուր շահերի պաշտպանությանը:
Այս համատեքստում կցանկանայի նշել Միության անդամ պետությունների՝ ռազմավարական կարևոր նշանակության դեղամիջոցներով և բժշկական կիրառման դեղագործական նյութերով ապահովվածության մակարդակի բարձրացմանը միտված գործողությունների ծրագրի մշակման կարևորությունը, որոնց արտադրությունը պետք է ապահովվի Միությունում:
Կարծում եմ, որ այսօր, առավել քան երբևէ, անհրաժեշտ է մշակել ինտեգրացիոն նախագծերի ֆինանսավորման մեխանիզմներ՝ այդ խնդիրներում ավելի ակտիվ ներգրավելով պետական ռեսուրսները և ԵԱՏՄ զարգացման վերազգային ինստիտուտները, այդ թվում՝ Մասնագիտացված ներդրումային ֆոնդերի ստեղծման միջոցով:
araratnews.am
