Փորձագետ. ՀՀ իշխանությունները չպետք է բարձրացնեն այսպես կոչված Մեղրիի միջանցքի ձեւավորման հարցը
Հայկական կողմը պետք է առավելագույն զսպվածություն դրսեւորի եւ կառավարության մակարդակով տարաբնույթ հանդիպումներ չնախաձեռնի, որոնց ժամանակ ամեն անգամ բարձրացվում է այսպես կոչված Մեղրիի միջանցքի ձեւավորման հարցը։ Այս մասին NEWS.am-ի թղթակցի հետ զրույցում ասաց քաղաքական գիտությունների դոկտոր, էներգետիկայի ոլորտի փորձագետ Վահե Դավթյանը։
Նա հիշեցրեց, որ որոշ ժամանակ առաջ նախարարների կաբինետը գումար էր հատկացնում Երասխ-Օրդուբադ-Մեղրի-Զանգելան-Հորադիզ կապող երկաթուղու կառուցման հետագա նպատակով։
Նշենք, որ ՀՀ կառավարությունը մարտի 3-ին 13 մլն դրամ հատկացրեց տարածքային կառավարման եւ ենթակառուցվածքների նախարարությանը՝ Երասխ-Ջուղա-Մեղրի-Հորադիզ երկաթուղու կառուցման գեոդեզիական աշխատանքներ իրականացնելու համար։
Փորձագետը նշեց, որ, ընդ որում, ոչինչ չի ասվում առանցքային ուղղությունների մասին, որոնք կարող են հետաքրքիր լինել Հայաստանի համար, օրինակ՝ Իջեւան-Ղազախ։
«Ներկայիս տուրբուլենտության, անորոշության եւ տրանսպորտային միջանցքների միջեւ շատ կոշտ դիմակայության պայմաններում Հայաստանը չպետք է շատ մեծ նախաձեռնություն ցուցաբերի, այլ պետք է հնարավորինս զսպի այս գործընթացի առաջընթացը։ Ցավոք, մենք ականատես ենք հակառակ գործընթացի, որում Հայաստանի իշխանությունները, չնայած շատ բարդ իրավիճակին, հայտարարում են այս գործընթացն արագացնելու անհրաժեշտության մասին՝ չնայած նրան, որ «Արեւելք-Աեւմուտք» հայեցակարգը (դրան է պատկանում նաեւ վերը նշված երկաթուղին) սկզբունքորեն հակասում է շահերին, այդ թվում՝ Ռուսաստանին»,- կարծում է Դավթյանը։
Հայաստանը պետք է առավելագույնս հետաձգի այս կամ այն քայլերն այս ուղղությամբ, քանի որ մեր խնդիրն է դիտարկել աշխարհաքաղաքական խաղի զարգացումը եւ միայն դրանից ելնելով որոշումներ կայացնել։ Երկրի իշխանությունները հապճեպ հայտարարություններով ու որոշումներով կարող են մեծ վնաս հասցնել պետությանը.
Երեւանը պետք է առաջ տանի Հյուսիս-Հարավ հայեցակարգը, եւ այդ մասին խոսում են տարածաշրջանի բոլոր առանցքային դերակատարները՝ Հնդկաստանից մինչեւ Իրան։ Հյուսիս-Հարավ միջանցքը կարող է օգնել Հայաստանին ներառական զարգացում ապահովել:
«Իսկ Արեւելք-Արեւմուտք միջանցքի մասով՝ այն ազդում է Հայաստանի տարածքի մի շատ փոքր հատվածի վրա, մինչդեռ Հյուսիս-Հարավն անցնում է ամբողջ Հայաստանով եւ մուլտիպլիկատիվ էֆեկտ կունենա տնտեսության շատ ոլորտների համար, էլ չասած դրա ռազմավարական նշանակության մասին»,- ընդգծեց փորձագետը։
news.am
