Բաքուն խոստացել է հարգել Ղարաբաղում ապրող հայերի իրավունքները
Ադրբեջանի ԱԳ նախարարությունը տարածել է հայտարարություն,որում մի շարք մեղադրանքներ հնչեցնելով Հայաստանի հասցեին, միաժամանակ խոստացել է ,որ Բաքվի կառավարությունը հարգելու և երաշխավորելու է Ղարաբաղի տարածաշրջանի բոլոր հայ բնակիչների իրավունքները:
«Ազեր Թաջ» լրատվական գործակալության հաղորդման համաձայն՝ Ադրբեջանի ԱԳ նախարարությունն իր տարածած հայտարարության մեջ խոսել է «Ղարաբաղի տարածաշրջանում հայ բնակիչների հետ դրական բանակցություններ անցկացնելու Բաքվի շարունակական քայլերի» և ինչպես նաև «Լաչինի նոր ճանապարհի կառուցման և տարածաշրջանի էներգետիկան ապահովելու համար Լաչինում փոքր էլեկտրակայանների օգտագործման ուղղությամբ Բաքվի գործողությունների մասին»։
Ադրբեջանի Հանրապետությունն այն դեպքում է նման դիրքորոշմամբ հանդես եկել,երբ ՀՀ վարչապետ Նիկոլ Փաշինյանը վերջերս «Ֆրանս Պրես»-ին տված հարցազրույցում, Բաքվի կառավարությանը մեղադրել է Ղարաբաղում էթնիկ զտումներ իրականացնելու մեջ և ասել է,-«Քանի դեռ Ադրբեջանի և Հայաստանի միջև խաղաղության պայմանագիրը չի ստորագրվել և չի վավերացվել երկու երկրների խորհրդարանների կողմից, նոր պատերազմի հավանականությունը մեծ է»:
Սա այն դեպքում, երբ Հայաստանի արտաքին գործերի նախարարության մամուլի խոսնակ Անի Բադալյանը երկու շաբաթ առաջ միջազգային հանրությանը կոչ է արել մեծացնել ջանքերը՝ Ադրբեջանի Հանրապետության կողմից Լեռնային Ղարաբաղի յոթամսյա պաշարմանը վերջ դնելու համար և հայտարարել է, «Ադրբեջանի Հանրապետությունը չնայած Արդարադատության միջազգային դատարանի որոշմանը, Լաչինի միջանցքում անօրինական անցակետ տեղադրելուց հետո, բազմիցս արգելել է Կարմիր Խաչի միջազգային կոմիտեի ներկայությունը տարածաշրջանում»:
Ռուսաստանը և որոշ արևմտյան երկրներ, այդ թվում՝ Ֆրանսիան և Ավստրիան, Ադրբեջանի Հանրապետությանը կոչ են արել դադարեցնել Ղարաբաղում բնակվող հայ բնակչության պաշարումը և բացել Լաչինի միջանցքը, սակայն Ադրբեջանի Հանրապետությունը դեռևս հստակ պատասխան չի տվել այդ կոչերին, ինչը վերջին ամիսներին Բաքվի և Երևանի միջև խաղաղ բանակցությունների լուրջ խոչընդոտներից մեկն է եղել։
Նշենք, որ Ղարաբաղում շրջափակման մեջ գտնվող ժողովուրդը տառապում է սննդի, դեղորայքի, վառելիքի և էլեկտրաէներգիայի պակասից, և հավանական է, որ Ղարաբաղում ավելի խորանա հումանիտար ճգնաժամը։