Հայաստանում երեխաների պաշտպանության համակարգային խնդիրներ կան. ՄԻՊ–ը թվեց դրանք
Հայաստանում երեխաների պաշտպանության համակարգը մի շարք խնդիրներ ունի` սկսած ուսումնական հաստատություններում երեխաներին բուլինգի ենթարկելուց, մինչև սեռական բռնության ենթարկված երեխաներին թիրախավորելն ու այդ արատավոր երևույթն արդարացնելը։ Այս մասին ԱԺ ամբիոնից հայտարարեց ՀՀ մարդու իրավունքների պաշտպան Անահիտ Մանասյանը` ելույթ ունենալով ԱԺ մարդու իրավունքների պաշտպանության և հանրային հարցերի մշտական հանձնաժողովի որոշմամբ հրավիրված խորհրդարանական լսումներում։
Նշենք, որ խորհրդարանական լսումների քննարկման թեման է «ՀՀ չորրորդ ազգային զեկույցում երեխայի իրավունքների վերաբերյալ ներկայացվելիք հարցերը»:
Անդրադառնալով երեխաների իրավունքների պաշտպանությանը վերաբերող ոլորտային խնդիրներին` Մանասյանը նշեց, որ առաջին հերթին դրանք վերաբերում են երեխաների նկատմամբ բռնության դեպքերին։
Նրա խոսքով` պետք է անդրադառնալ երեխաների հանդեպ ոչ միայն ֆիզիկական, այլև հոգեբանական և այլ բռնության տեսակներին։
«Անդրադառնալով ուսումնական հաստատություններում բուլինգի հիմնախնդրին` պետք է նշեմ, որ դա շատ լուրջ խնդիր է, քանի որ մեր մշտադիտարկումները ցույց են տալիս, որ ուսուցիչները, լինելով հիանալի մարդիկ, չունեն այն մասնագիտական հմտությունները, որոնք պետք են այդ և նմանատիկ երևույթները կանխարգելելու համար»,–ասաց Մանասյանը։
Sputnik.