Այս տարի ՀՀ–ն կփորձարկի էլեկտրոնային բեռնագրերով փոխադրումները դեպի ԵԱՏՄ երկրներ
Այս տարի Հայաստանը մտադիր է փորձարկել էլեկտրոնային բեռնագրերով փոխադրումները դեպի ԵԱՏՄ երկրներ։ Այս մասին Sputnik Արմենիայի թղթակցին ասաց ՀՀ տարածքային կառավարման և ենթակառուցվածքների փոխնախարար Արմեն Սիմոնյանը։
Էլեկտրոնային բեռնագրերով փորձնական փոխադրումն արդեն իրականացվել է Ռուսաստանի և Բելառուսի միջև, այժմ դիտարկվում է ԵԱՏՄ բոլոր երկրների միջև դրա իրականացման հնարավորությունը:
«Թղթային հաշիվ-ապրանքագրերը նվազագույնի հասցնելը ժամանակի զգալի խնայողության կհանգեցնի սահմանի հատման ժամանակ: Ավելի վաղ նման գնահատում էր անցկացրել ՄԱԿ-ի Եվրոպական տնտեսական հանձնաժողովը (UNECE), հիմա կարևոր է ստուգել, թե ինչպիսին կլինի այդ ցուցանիշը ԵԱՏՄ երկրներում»,- ասաց մեր զրուցակիցը։
Այժմ հայկական կողմը այդ փորձնական փոխադրումների ժամկետները համաձայնեցնում է Եվրասիական տնտեսական հանձնաժողովի հետ։ Սիմոնյանի խոսքով՝ էլեկտրոնային հաշիվ-ապրանքագրերի փոխադարձ ընթերցման ծրագրային ապահովումն արդեն կա, մնում է ավարտին հասցնել ԵԱՏՄ երկրներում էլեկտրոնային ստորագրությունների փոխադարձ ճանաչման հարցերը։
Նա հիշեցրեց, որ Հայաստանն ավելի վաղ արդեն միացել է էլեկտրոնային բեռնագրերի վերաբերյալ միջազգային կոնվենցիային և հիմա պատրաստ է դրանք փորձարկել ԵԱՏՄ տարածքում:
arm.sputniknews
